Elordany kóshirý, Elbasy jáne Rım Papasymen kezdesý: Nadejda Petýhovanyń esteligi

NUR-SULTAN. QazAqparat – Nadejda Petýhova 1997 jyly elordany Almatydan Aqmolaǵa aýystyrǵan kezde qalalyq máslıhattyń depýtaty bolǵan. ıAǵnı elordany aýystyrý, jańa qalanyń qalyptasý jáne damý protsesiniń kýágeri. Búginde elordanyń qurmetti turǵyny zeınette bola tura, Eýrazııa medıtsına qaýymdastyǵynyń vıtse-prezıdenti mindetin atqaryp júr. Osy oraıda keıipker QazAqparat tilshisimen Elbasy Nursultan Nazarbaev týraly, sondaı-aq keshegi jáne búgingi elordaǵa qatysty tarıhı estelikterimen bólisti.

«Táýelsizdik kúni – eń basty ári mańyzdy mereke. Elordanyń turǵyndary – baqytty adamdarmyz. Elbasynyń danalyq sheshiminiń arqasynda bizdiń qala elimizdiń basty ortalyǵyna aınaldy. Árıne, bastapqyda Aqmola elorda bolady degen oı kúmán týǵyzdy. Óıtkeni qala kishkentaı ǵana edi. Onyń ústine elordany aýystyrý sáti elimizdiń qarjylyq, ekonomıkalyq, áleýmettik daǵdarys dáýirimen sáıkes keldi. Biraq Elbasy sendi. Men ol kezde qalalyq máslıhat depýtaty edim. Biz elordany damytýdyń bas josparyn qabyldadyq. Sheshimdi qabyldaı otyryp, «rasymen osy jospardyń júzege asýy múmkin be?» dep óz-ózimizge suraq qoıatynbyz. Búginde onyń nátıjesine bárimiz kýámiz. Aqmola qalasy álem tanyǵan elordaǵa aınaldy», - dedi Nadejda Petýhova.

Onyń aıtýynsha, Táýelsizdik alǵan soń, elimizdiń aıaǵynan turýy ońaıǵa soqqan joq. Al 30 jyldyq eńbektiń ishinde Qazaqstan óz joly men jetistigi bar, damýshy el qatarynda.

«Búginde elordamyz – Nur-Sultan qalasy túrli halyqaralyq kezdesýler men mańyzdy oqıǵalardyń ortalyǵyna aınaldy. 2000 jyldardyń basynda Rım Papasynyń elordaǵa kelgeni áli esimde, ol aıtýly oqıǵa boldy. Sonda Rım Papasynyń bizdiń elmen qoshtasyp, ushyp bara jatqanda aıtqany: «Qazaqstannyń jeri erekshe, ony jarqyn bolashaq kútip tur», dedi. EQYU jáne basqa da halyqaralyq uıymdardyń keıbir ókilderi Qazaqstan ekonomıkalyq daǵdarys pen syrtqy kúshterdiń yqpalynan usaq-túıekke bólinip ketedi degendi keltirdi. Alaıda kópvektorly saıasattyń arqasynda biz óz ultymyzdy saqtap qaldyq», - deıdi ol.

Nadejda Petýhova elordany aýystyrǵan jyldary depýtattyq qyzmetpen qatar, qalalyq balalar aýrýhanasynyń bas dárigeri mindetin alyp júrgen.

«Ol kezde qala boıynsha jalǵyz ǵana balalar aýrýhanasy boldy, onyń ózi kishkentaı edi. Nursultan Ábishuly jumys saparymen bizdiń aýrýhanaǵa keldi. Sonda Elbasy shala týǵan nárestelerdi kórip, menen: «Olar ómir súrip kete me?», dep surady. Men «Árıne!» dep jaýap berdim. Odan keıin Elbasymen jolyǵýdyń 2005 jyly sáti tústi. Sol kezde meniń 3 jasar nemerem Nursultan Nazarbaevqa arnap óleń oqyp, kartına syılady. Qazir sol nemerem elordadaǵy Nazarbaev Ýnıversıtetinde joǵary bilim alyp jatyr. Jalpy Elbasy balalardy asa jaqsy kóredi jáne balalar da oǵan jaqyn», - degen jyly lebizimen bólisti qoǵam qaıratkeri.

Sondaı-aq elordanyń damýyna eńbegi sińgen turǵyn qala ataýynyń ózgerýine qatysty esteligimen bólisti.

«Táýelsizdik alǵaly beri Qazaqstannyń ózindik saıası bılik júıesi qalyptasty. Elimizde eki palataly Parlament quryldy. Birde Elbasy Nursultan Ábishuly el jáne qala basshylyǵyn Jastar saraıyna jınap, elordanyń ataýyn ózgertý týraly oıyn ortaǵa saldy. Elbasy «Astana» degen ataýǵa toqtaldy, biz biraýyzdan qoldadyq. Al «Nur-Sultan» bolyp ózgerýine kelsek, bul halyq pen Elbasynyń zamandas, úzeńgiles tulǵalardyń qalaýy», - dedi N. Petýhova.