Elordanyń birinshi avtobýs parki 100 kólikpen tolyǵady
«Bizdiń parkte 1035 avtobýs bar, qyrkúıekte taǵy 100 avtobýs satyp almaqpyz. Kúndelikti 750-800 avtobýs jolǵa shyǵyp, 400-450 myń jolaýshyny tasymaldaımyz. Byltyrǵa qaraǵanda qoǵamdyq kólik jolaýshylarynyń sany artyp otyr. Kelesi jyly taǵy 300 shaqty avtobýs alý josparda bar», — dedi № 1 avtobýs parkiniń basqarma tóraǵasy Madııar Tuqpatov baspasóz týry barysynda.
Sondaı-aq, avtobýs parkiniń basshysy qoǵamdyq kólik baǵasynyń qymbattaýyna qatysty pikir bildirdi.
«Elordada avtobýs bıletiniń baǵasy 2012 jyly 90 teńge bolyp belgilendi, sodan beri ózgergen joq. Osy ýaqyt ishinde janar-jaǵarmaı quny ósti, ol kezde lıtri 110 teńge bolsa, qazir dızel baǵasy 300 teńge. Júrgizýshilerdiń jalaqysyn kóterdik, qazir eń tómengi jalaqy 680-700 myń teńge aralyǵynda, joǵarysy mıllıon teńgeden asyp túsedi. Avtobýstardyń aralyǵyn jıilettik, buryn jolaýshylar keıbir avtobýstardy 20-25 mınýt kútse, qazir aralyq 15-12 mınýtqa deıin qysqardy. Kelesi jyly 300 avtobýspen tolyqsaq, 8-7 mınýtqa deıin qysqartý múmkindigimiz bar», — deıdi ol.
Aıta ketsek, bıyl № 1 avtobýs parkine 50 jyl toldy. Ol — 1974 jyly qurylǵan qaladaǵy eń alǵashqy ári eń úlken avtobýs parki.