Elordalyqtarǵa turǵyn úı-kommýnaldyq sharýashylyq salasyndaǵy jańa zańnama túsindirildi
Nur-Sultan qalasynyń Esil aýdanynda osy jyldyń 7 qańtarynda kúshine engen turǵyn úı-kommýnaldyq sharýashylyq salasyndaǵy zańnamany túsindirý boıynsha turǵyndarmen jáne qyzmet kórsetýshi uıymdardyń ókilderimen kezdesý aıaqtaldy. Kezdesý «erkin mıkrofon» formatynda ótti. Kez kelgen azamat TKSh salasyndaǵy zań jobasyn ázirleýshilerge de, aýdan ákimine de suraq qoıý múmkindigine ıe boldy. Bir apta ishinde kezdesýge myńǵa jýyq turǵyn keldi.
Qala turǵyndaryn basqarýdyń jańa úlgisi - Múlik ıeleri birlestigine kóshý protsedýrasy, turǵylyqty jerge tirkelý, aıaldama pavılondaryn ornatý, kóshelerdi jaryqtandyrý, kógaldandyrý, aýlalardy abattandyrý syndy máselelerge zor qyzyǵýshylyq tanytty. Kóptegen másele birden sheshildi. Máselen, saıabaq qurylysyn talqylaý barysynda ótken jyldyń jeltoqsan aıynda ótkizilgen qoǵamdyq tyńdaý óz jemisin berdi. Ol kezde turǵyndar bólingen ýchaskelerge qajetti qondyrǵylarǵa qatysty naqty usynystar bergen bolatyn.
Aýdan ákimi mektepterdegi oryn tapshylyǵyna oraı qazirgi ýaqytta 4 mektep pen 1 balabaqsha salynyp jatqandyǵyn aıtty. Atalǵan nysandar № 59, 71, 75, 76, 77, 79, 84, 85 mektepterdegi oryn tapshylyǵyn joıýǵa septigin tıgizedi.
Sonymen qatar TKSh boıynsha máselelerdiń ózektiligin eskere kele turǵyndarǵa keńes beretin baılanys ortalyǵyn qurý protsesi talqylanyp jatyr. Konferentsııa barysynda kóterilgen ózge máseleler Esil aýdanyn damytý josparyna engiziletin bolady.
Aýdan ákiminiń tóraǵalyǵymen ótken konferentsııaǵa QR Parlamenti Májilisiniń depýtattary Sapar Ahmetov pen Pavel Kazantsev, qalalyq máslıhat depýtattary Qaraqat Ábden men Mıras Shekenov jáne qalalyq basqarmalardyń, merdiger uıymdardyń ókilderi qatysty.
Aýdan turǵyndarymen mundaı formattaǵy kezdesýler ákimderdiń turǵyndardyń esep berý jıyndary aıasynda 29 qańtar men 4 aqpan aralyǵynda ótkiziledi. Tolyqqandy aqparat resmı saıtta jáne aýdany ákiminiń jáne ákimdiktiń (@berik.jakenov, @esilakimat) Instagram men Facebook paraqshalarynda ornalastyrylady.