Elordalyqtar Gennadıı Golovkındi qoldap óleń oqydy

ASTANA. QazAqparat - Meksıkalyq Saýl Alvaresten jeńilgen qazaqstandyq boksshy Gennadıı Golovkındi qoldaǵan elordalyqtar óleń oqyp, vıdeorolık túsirdi, dep habarlaıdy QazAqparat tilshisi.

Vıdeorolıkti avtorlary áleýmettik jelige júktegen. Óleńdi Saıd Sapın jazǵan.

«Maǵan barlyq ýaqytta da Gennadıı unaıdy. Onyń jekpe-jegin alǵash ret Olımpıada oıyndarynda kórip, judyryqtasý mánerine tań qalǵanym esimde. Menińshe, Gennadıı jastar úshin tamasha úlgi bolarlyq jan. Gennadııdiń Kanelo Alvareske qarsy sońǵy jekpe-jegin kórgennen keıin oǵan qoldaý kórsetkim keldi. Biraq, ony qalaı júzege asyrarymdy bilmedim. Sodan keıin meniń aqyn ekenimdi biletin jaqyn dosym óleń jazýǵa usynys jasady», - dedi Saıd Sapın.

Sonymen qatar ol Gennadıı Golovkın áıteýir bir osy joldaýlaryn kóretindigine úmit artatyndyǵyn aıtty.

Eske salaıyq, Golovkın - «Kanelo» rematchy 16 qyrkúıek kúni Amerıka Qurama Shtattarynyń Las-Vegas qalasyndaǵy T-Mobile Arena-synda ótken bolatyn. Nátıjesinde otandasymyz tóreshiler sheshimimen (113-115, 114-114, 113-115) jeńilip, WBA Super, WBC jáne IBO tujyrymdary boıynsha orta salmaqtaǵy chempıondyq beldikterinen aıyryldy. Olardyń birinshi aıqasy byltyr teń nátıjemen aıaqtalǵan bolatyn.