Elordalyq júrgizýshiler beınekameralar arqyly tirkelgen aıyppuldardy endi eGov.kz portalynda tóleı alady

ASTANA. 22 qazan. QazAqparat - eGov.kz portalynda jol qozǵalysy erejelerin buzǵan júrgizýshiler úshin aıyppuldardy tóleý servısi iske qosyldy, dep habarlaıdy «Ulttyq aqparattyq tehnologııalar» AQ baspasóz qyzmeti.  

Bul qyzmetti ázirshe tek Astana qalasynda foto-beıne belgileý júıesine túsip qalǵan júrgizýshiler ǵana qoldana alady.

«Tólemdi júrgizý óte qarapaıym. Bul úshin www.egov.kz avtorızatsııadan ótýi jáne «Kólik jáne kommýnıkatsııa» - «Jol qozǵalysy erejesin buzǵany úshin aıyppuldardy tóleý» taraýyn tańdaýy kerek. Sosyn avtomobıldiń memlekettik tirkeý nómirin jáne tehnıkalyq pasporttyń nómirin nemese aldyn ala jazylǵan derekterdi (blankiniń túri, blankiniń serııasy, blankiniń nómiri, buzýshylyq kúni) engizý qajet. Odan keıin paıdalanýshy tólem kartasy, «Sberbank» AQ EB jeke shoty jáne shot-tapsyrystyń kómegimen aıyppuldy tóleıdi jáne elektrondyq chekti alady. Atalmysh chekti kez kelgen ýaqytta eGov.kz portalyndaǵy «Qyzmetterdi tóleý tarıhy» taraýynan tabýǵa bolady», - delingen «UAT» taratqan habarlamada.

Búgingi kúni bul qyzmet elordada ǵana jumys jasaıdy, alaıda tehnıkalyq daıyndyqtyń sharasy boıynsha aǵymdaǵy jyldyń aıaǵyna deıin jyldamdyq ólsheý quralymen belgilengen buzýshylyqtar úshin aıyppuldardy onlaın-tóleý eldiń basqa da qalalarynda iske qosylady.

Foto-beıne belgileý júıesimen belgilengen buzýshylyqtar úshin aıyppuldardy tóleý týraly naqtyraq Qazaqstannyń barlyq opeatorlary úshin táýlik boıy jáne tegin 1414 nómiri boıynsha bilýge bolady.