Elordalyq jumyspen qamtý ortalyǵynyń basshysy para alǵany úshin sottaldy

ASTANA. QazAqparat - Astana qalasy Almaty aýdandyq soty qalalyq jumyspen qamtý ortalyǵy basshysyna para alǵany úshin aıyptaý úkimin shyǵardy, dep habarlaıdy QazAqparat sottyń saıtyna silteme jasap.

Sonymen qatar, JShS dırektory para bergeni úshin sottaldy.

Tergeý barysynda Astana qalasynyń jumyspen qamtý ortalyǵynyń basshysy B-ǵa jumyssyzdardy oqytýǵa kelisimshart jasasqany, sondaı-aq olar boıynsha tólem jasaǵany úshin JShS dırektory G-dan 310 myń teńge para alǵan degen aıyp taǵyldy.

Sottalýshylardyń kinási sotqa usynylǵan dáleldemeler, olardyń moıyndaý, B-nyń turǵylyqty jeri boıynsha tintý hattamasy jáne alǵan paranyń qalǵan bóligin tárkileý, is boıynsha basqa dáleldermen rastaldy.

Qylmystyq is sottalýshylar men prokýrordyń kináni moıyndaý týraly protsessýaldyq kelisim jasaýyna baılanysty bitimgershilik is júrgizý tártibimen qaraldy.

Sottalýshylardyń jaýapkershiligi men jazasyn olardyń jasaǵan isine shyn júrekten ókingeni jáne árqaısysynyń asyraýynda kámeletke tolmaǵan balalardyń bolýy jeńildetti.

Jaǵdaıdy aýyrlatatyn mán-jaı joq.

B. para alǵany úshin kináli dep tanylyp, oǵan 9,3 mln teńge, ıaǵnı alǵan paranyń 30 eselengen somasynda aıyppul salyndy.

G. para bergeni úshin kináli dep tanylyp, oǵan paranyń 20 eselengen somasyn - 6,2 mln teńge kóleminde aıyppul salyndy.

Sottalǵandar ómir boıy memlekettik qyzmette jumys atqarý quqyǵynan aıyrylady.

Sot úkimi zańdy kúshine engen joq.