Elordalyq «Jedel járdemniń» 59 brıgadasy planshettik qurylǵylarmen jaraqtandyryldy

ASTANA. 25 qańtar. QazAqparat - «E-jedel járdem» ınnovatsııalyq jobasy men «Smart Astana» tujyrymdamasy aıasynda elordanyń 59 jyljymaly medıtsınalyq jedel járdem brıgadasy elektrondy planshettik qurylǵylarmen jaraqtandyryldy, dep habarlaıdy astana.kz saıty Astana qalasynyń Densaýlyq saqtaý basqarmasyna silteme jasap.

«Planshetter: GPS-navıgator, IP-telefonııa jáne elektrondy medıtsınalyq anyqtamalyq - negizgi úsh fýnktsııany atqarady. GPS-navıgator jedel járdem brıgadasyna qala kóshelerindegi tyǵyndy aınalyp ótip, júrý ýaqytyn qysqartýǵa múmkindik beredi. IP-telefonııa kómegimen jedel járdem qyzmetkerleri patsıentpen tikeleı baılanysqa shyǵý múmkindigin aldy. Elektrondy medıtsınalyq anyqtamalyqta aýrýlar, onyń dıagnostıkasy, emdeý tásilderi men dárilik preparattar týraly qajetti aqparattar toptastyrylǵan», - delingen habarlamada.

Sonymen qatar, jedel járdem brıgadasy men qalanyń 18 emdeý-profılaktıkalyq mekemesi arasynda tikeleı telefon baılanysy qamtamasyz etildi.

«Atalǵan jobany engizý halyqqa aýrýhanaǵa deıingi deńgeıde medıtsınalyq kómek kórsetýdiń sapasy men qarqynyn anaǵurlym arttyrýǵa, sondaı-aq, qaıtalama shaqyrýlar men kedergilerdi azaıtýǵa múmkindik týǵyzdy», - dep sanaıdy basqarma.