Elordalyq jedel járdem stansasy 52 jańa kólikpen tolyqty

NUR-SULTAN. QazAqparat - Nur-Sultan qalasyndaǵy jedel medıtsınalyq kómek stansasy 52 jańa avtokólikpen tolyqty. Bul jóninde Densaýlyq saqtaý mınıstrliginiń baspasóz qyzmetine silteme jasap QazAqparat habarlaıdy.

25 jeltoqsanda QR Densaýlyq saqtaý mınıstri Eljan Birtanov pen Nur-Sultan qalasynyń ákimi Altaı Kólginov jedel medıtsınalyq járdem stansasyna 52 jańa avtokóliktiń kiltin tapsyrdy.

«Jaqynda respýblıkalyq bıýdjet esebinen taǵy 22 jańa kólik keledi», - dedi Eljan Birtanov.

Bul - Densaýlyq saqtaý mınıstrliginiń jergilikti atqarýshy organdarmen birlesken 103 qyzmetin ulttyq standarttar men halyqaralyq talaptarǵa sáıkes jabdyqtaýǵa arnalǵan aýqymdy baǵdarlamasynyń bastamasy.

Barlyq avtomobılde zamanaýı jabdyqtar, sonyń ishinde defıbrıllıatorlar, elektrokardıograf, ókpeni jasandy jeldetý apparattary, ottegi ballondar bar. Baǵdarlama aıasynda 2020 jyldyń alǵashqy aılarynda óńirlerge 800-den astam sanıtarlyq kólik jetkiziledi.

Sharaǵa Densaýlyq saqtaý mınıstri jáne shuǵyl medıtsınanyń ulttyq úılestirý ortalyǵynyń jáne astanalyq ákimdiktiń ókilderi qatysty.

Jańa avtomobılder Nur-Sultan qalasy jedel medıtsınalyq kómek qyzmetiniń avtoparkin 100 paıyz tolyqtyrýǵa, 103 qyzmeti jumysynyń jedeldigin arttyrýǵa múmkindik beredi.

Sondaı-aq, mınıstr «Nur-Sultan» jedel járdem stansasynyń ujymymen kezdesip, dárigerler jalaqysy 2020 jyldyń 1 qańtarynan bastap - 30 paıyzǵa, medbıkeler jalaqysy - 20 paıyzǵa kóteriletinin habarlady.