Elordalyq jastar dárigerlerge «Alǵys paketin» taratýda

NUR-SULTAN. QazAqparat - Elordada «Jas Otan» jastar qanatynyń bastamasymen dárigerlerdi qoldaýǵa arnalǵan «Alǵys paketi» atty aktsııa ótip jatyr, dep habarlaıdy QazAqparat tilshisi.

«15 shildeden bastap dárigerlerdi qoldaý úshin «Alǵys paketi» dep atalatyn aktsııany bastadyq. Qazirgi ýaqytta aýrýhanalarǵa baryp, dárigerlerge azyq-túlik, ıaǵnı quramynda búgingi kúni asa qajetti dárýmender bar jemis-jıdek, túrli pecheneler, shokolad salynǵan paketter taratamyz. Bul qala jastary men volonterleriniń atynan beriledi. Koronavırýspen kúrestiń aldyńǵy shebinde kúni-túni jumys istep jatqan dárigerlerge qoldaý kórsetkimiz keledi. Keshe úsh aýrýhanaǵa, búgin de úsh aýrýhanaǵa bardyq. Kún saıyn úsh aýrýhanaǵa baryp, aktsııany birneshe kún jalǵastyrýdy josparlap otyrmyz», - dedi «Jas Otan» jastar qanaty elordalyq fılıalynyń tóraǵasy Baǵdáýlet Jandildaev.

Sonymen qatar ol aktsııanyń qandaı qarajatqa júzege asyrylatyndyǵyn aıtty.

«Aktsııa volonterlerdiń jarnalary jáne demeýshilik qarajaty esebinen júzege asyrylady», - dedi ol.