Elordalyq teatrda «QALLEKI» shyǵarmashylyq laboratorııasy ashyldy

NUR-SULTAN. QazAqparat – Q.Qýanyshbaev atyndaǵy memlekettik akademııalyq qazaq mýzykalyq drama teatrynda erkin shyǵarmashylyqqa arnalǵan «QALLEKI» laboratorııasy ashyldy, dep habarlaıdy QazAqparat.

Zerthana shymyldyǵy teatrdyń jas akteri Bázil Sultanǵazy rejısserlik etken Oralhan Bókeıdiń «Uıqym kelmeıdi» dramasymen saltanatty túrde ashyldy.

Laboratorııanyń maqsaty – shyǵarmashyl jandar úshin baılanys ortasyn qurý jáne ónerge ózgeshe kózqaras jasap, tyń dúnıelerdi sahnalaý. Sondaı-aq, sheteldik mamandarmen sheberlik sabaqtaryn uıymdastyrý, jazýshy-dramatýrgtermen kezdesý, pesa talqylaý, jańa rejısserlermen baılanys ornatý syndy kóptegen shara josparlanǵan.

«Osy teatrǵa basshylyqqa kelgende jańa ǵımaratty araladym. Sonda osy zaldy kórip, kóz aldyma spektakl oınaǵany elestedi. Sodan keıin Bázildiń ózi balalardy jınap alyp, jańa qoıylymdarǵa daıyndalyp júr eken. «Bolam degen balanyń betine qaqpa, belin bý» deıdi. Sol jastarǵa múmkindik berý úshin eksperımentaldy zerthana ashyp jatyrmyz. Bul ǵımarattaǵy negizgi eki zalymyzdan keıingi úshinshi sahna bolyp otyr. Árıne, mundaı jobalar jer-jerde ashylyp jatyr. Biraq úlken memlekettik teatr ishinen laboratorııa birinshi ret qolǵa alynýda. Muny kópfýnktsııaly zal dep ataýǵa bolady. Qalaı erkińe baǵyndyryp, qandaı formatta qoıylym qoıýdy óziń sheshesiń», - dedi Teatrdyń kórkemdik jetekshisi, qazaqstannyń eńbek sińirgen qaıratkeri Qýandyq Qystyqbaı jýrnalısterge arnalǵan baspasóz konferentsııasynda.

Taǵy bir ereksheligi, Qalleki laboratorııasy – elordalyqtarǵa arnalǵan alǵashqy keshki teatr. Bul da jastardyń keshki ýaqytyn teatrda ótkizýi úshin jasalǵan áreket. Munda tek qoıylymdar ǵana emes, dramatýrgterdiń pesalaryn talqylaý, aqyndar keshi, avtorlyq ánder keshi syndy túrli sharalardy ótkizýge bolady. Bıletteri onlaın satylady.

«Qoǵamdyq oryndarda óz zamandastarymmen sóıleskende, «Teatrǵa nege kelmeısiń?» degen suraqqa «Maǵan qyzyq emes» degen jaýaptar estıtinmin. Sondyqtan, búgingi qoıylymda da óz zamandastarymyzdyń problemasyn qozǵaýǵa tyrystyq. Spektaklde 9 akter oınaıdy. Barlyǵy – Qallekı teatrynyń jastary. Onda alǵashqy mahabbat, adam boıyndaǵy sezimder týraly aıtylady», - deıdi akter, rejısser Bázil Sultanǵazy.