Elordalyq sportshylar Qurban aıt merekesine oraı qaıyrymdylyq aktsııasyna qatysty

NUR-SULTAN. QazAqparat - Elordalyq sportshylar muqtaj otbasylarǵa qurbandyq etin taratý aktsııasyna qoldaý bildirdi, dep habarlaıdy qala ákimdiginiń resmı saıty.

Elorda ákimdigi uıymdastyrǵan sharaǵa álem jáne Azııa chempıondary qatysty.

«Nur-Sultan ákimdigimen birlesip, Qurban aıt merekesine oraı muqtaj jandarǵa et taratýmen aınalystyq», - dedi eskek esýden Qazaqstan chempıony Dıasbek Naqyp.

Aıta keteıik, ákimdik uıymdastyrǵan aktsııa materıaldyq qoldaýǵa muqtaj 3,5 myńnan astam otbasyn qamtydy. Júzdegen eriktiler qurbandyq etin taratýǵa kómektesip, avtovolonterler bul paketterdi kórsetilgen mekenjaılarǵa jetkizedi.

«Men kópbalaly anamyn. Qasıetti merekede kópbalaly otbasylardy umytpaǵanyna óte qýanyshtymyn. Bizge únemi kómektesip turady. Elorda ákimdigine alǵys aıtqym keledi», - dedi elorda turǵyny Leıla Jumalıeva.
Esterińizge sala keteıik, bıyl qala ákimdigi men Múftııat birlesip qurban2021.kz saıty arqyly onlaın-qurbandyq shalý uıymdastyrdy.