Elordalyq polıtsııa departamenti úshin 42 avtokólik satyp alyndy

NUR-SULTAN. QazAqparat - Іshki ister mınıstri Erlan Turǵymbaev pen Nur-Sultan qalasynyń ákimi Altaı Kólginov elordadaǵy quqyqtyq tártipti jáne onyń turǵyndarynyń qaýipsizdigin qamtamasyz etý deńgeıin tekserdi, dep habarlaıdy QazAqparat Polisia.kz-ke silteme jasap.

Mınıstr qala polıtsııasynyń birqatar nysandaryn aralap, Memleket basshysynyń halyqpen quqyq buzýshylyqtyń aldyn alýda tyǵyz yntymaqtastyq ornatýǵa jáne azamattardyń polıtsııaǵa qoljetimdiligin barynsha jeńildetýge baǵyttalǵan polıtsııa jumysynyń servıstik modelin jáne «qadamdyq qoljetimdiliktegi polıtsııa» qaǵıdatyn engizý jónindegi tapsyrmalarynyń oryndalýymen tanysty. «Qadamdyq qoljetimdiliktegi polıtsııa» qaǵıdatyn iske asyrýdaǵy sheshimderdiń biri modýldik úlgidegi statsıonarlyq beketterdi ornatý jáne ýchaskelik polıtsııa pýnktteriniń sanyn ulǵaıtý boldy.

Ýchaskelik polıtsııa pýnktine barǵan kezde ýchaskelik polıtsııa ınspektorlary qyzmetiniń sapasyn jaqsartý, ýchaskelik pýnktter, mobıldi beketter jelisin ońtaıly ornalastyrý jáne keńeıtý, azamattardyń saýalyna den qoıý jedeldigin arttyrý jónindegi sharalar qaraldy. Bıylǵy jyly 10 ýchaskelik pýnkt pen azamattardyń suraýlaryna polıtsııanyń ýaqtyly jáne sapaly áreket etýin qamtamasyz etetin 10 modýldik polıtsııa beketi iske qosyldy. Jyl saıyn elordalyq polıtsııanyń materıaldyq-tehnıkalyq bazasy jaqsaryp keledi. Qoldanysta quqyqtyq tártipti qorǵaýǵa jáne qylmysqa qarsy kúreske arnalǵan qazirgi zamanǵy tehnıka men qyzmettik avtokólik bar. Bıyl ákimdiktiń qoldaýymen Polıtsııa departamenti úshin 42 avtokólik jáne 57 kompıýterlik tehnıka satyp alyndy. Munyń barlyǵy azamattardyń ótinishterine jedel den qoıý, ishki ister organdarynyń ashyqtyǵy men qoljetimdiligi úshin jasalýda. Bul elorda turǵyndary men polıtseıler arasynda tyǵyz qarym-qatynas ornatýǵa, usaq quqyq buzýshylyqtardyń aldyn alýǵa jáne asa aýyr qylmystardy boldyrmaýǵa múmkindik beredi.
Memleket basshysynyń tapsyrmalaryn iske asyrý maqsatynda «Halyq únine qulaq asatyn memleket» tujyrymdamasy aıasynda quqyqtyq tártipti qamtamasyz etý salasyna tsıfrlyq sheshimder belsendi engizilýde. Halyqpen tikeleı baılanysta bolatyn syrtqy qyzmettiń barlyq qyzmetkerleri planshettermen jáne beınetirkegishtermen qamtamasyz etilgen. Qala kóshelerinde arnaıy qurylǵylar ornatylady, olar zańǵa qaıshy áreketter nemese tótenshe jaǵdaılar týyndaǵan kezde dabyl sıgnalyn berýge jáne polıtsııaǵa shuǵyl qońyraý shalýǵa arnalǵan. Qazirgi ýaqytta azamattar kóp jınalatyn jerlerde azamattardyń polıtsııaǵa qashyqtan júginýi úshin 13 «dabyl batyrmalary» ornatylǵan. Qurylǵylar iske qosylǵannan beri 700-ge jýyq sıgnal kelip tústi. Negizinen adamdar keńes alýǵa, qujattar joǵalǵan kezde, habar-osharsyz joǵalǵan adamdy izdeýge, telefon urlyǵy, páter urlyǵy, dene jaraqatyn salý jáne basqa da jaǵdaılarda júgindi. – Bizdiń basty mindetimiz – azamattardyń qaýipsizdigi. Sondyqtan biz ýchaskelik ınspektordyń – polıtsııanyń ulttyq servıstik modeliniń basty fıgýrasynyń tıimdi jumys isteýi, «qadamdyq qoljetimdiliktegi polıtsııa» qaǵıdatyn qamtamasyz etý jáne qajet bolǵan jerde tártip saqshylarynyń turaqty túrde bolýy úshin barlyq jaǵdaıdy jasaýdy jalǵastyramyz, – dep atap ótti ІІM basshysy.