Elordalyq polıtseıler zeınetkerlerden aqsha alǵan dropperdi ustady

ASTANA. QazAqparat - Astananyń jedel ýákilderi ınternet-alaıaqtardyń nusqaýy boıynsha jumys istegen «kýrerdi» táýlik ishinde anyqtap, ustady, – dep habarlaıdy Polisia.kz.

Dropper negizinen elordanyń qart turǵyndarynyń úıine baryp otyrǵan. 85 jastaǵy áıel polıtsııaǵa aryzdanyp, belgisiz jigitke 1 mln 600 myń teńge bergenin aıtqan.

Zeınetkerdiń aıtýynsha, oǵan bir er adam qońyraý shalyp, ózin quqyq qorǵaý organynyń qyzmetkeri retinde tanystyrǵan. Sodan keıin ol áıeldiń nemeresi jol-kólik oqıǵasyna sebepshi bolǵanyn aıtyp, jaǵdaıdy retteý úshin aqsha talap etken. Turǵyn aqshany úıine kelgen kýrerge bergen. Alaıda biraz ýaqyttan keıin bunyń alaıaqtardyń aılasy ekenin túsingen.

Alaıaqtar 65 jastaǵy zeınetkerdi de aldaǵan. Áıel dropperge 1 mln 400 myń teńge berip jibergen. Osy shema boıynsha qalanyń taǵy bir 85 jastaǵy turǵyny aldanyp qaldy. Ol alaıaqtarǵa 3 mln 700 myń teńge bergen.

– Kúdikti quryqtaldy. Tergeý barysynda onyń Telegram qosymshasynda habarlandyrý kórip, sol arqyly «kýrer» bolyp jumysqa turǵanyn anyqtadyq. Ol ınternet-alaıaqtarǵa aldanǵan zeınetkerlerden aqsha áketip otyrǵan. Qolma-qol aqshanyń belgili bir bóligin ózine qaldyryp, qalǵan bóligin bank derektemeleri arqyly shetelge jibergen. Qazirgi ýaqytta ustalǵan jigit ýaqytsha ustaý ızolıatorynda, – dedi Astana qalasy PD «Almaty» aýdany PB aǵa jedel ýákili Altynhan Mýhıddınov.