Elordalyq polıtseıler esirtkige qarsy skrınıngten ótti

ASTANA. QazAqparat – Bas shahardyń maslıhatynda depýtattar saýalyna jaýap bergen Astana qalalyq polıtsııa departamentiniń esirtki qylmysyna qarsy is-qımyl basqarmasynyń bastyǵy Rýstam Ǵazızov osyǵan deıin polıtseılerdiń esirtki qylmysyna qatysty ustalǵanyn málim etti, dep habarlaıdy QazAqparat tilshisi.

Otyrys barysynda depýtattar Qostanaı oblysynda ustalǵan polıtsııa qyzmetkerin mysal etip, basqarma basshysyna «Astana boıynsha esirtkimen kúresetin organnyń qatarynda osyndaı qyzmetkerler anyqtaldy ma jáne onyń aldyn alý úshin ne istelip jatyr ?», degen saýal qoıdy.

«Qostanaı oblysyndaǵy oqıǵaǵa qatysty eshteńe aıta almaımyn. Men tek óz basqarmama jaýaptymyn. Biz qaýipsizdik qyzmetimen birge turaqty tekserý júrgizemiz. Biz taıaýda basqarma qyzmetkerlerin skrınıngten ótkizdik. Onyń nátıjesi qyzmetkerlerdiń eshqaısysy esirtki tutynbaıtynyn kórsetti. Iá, qaýipsizdik qyzmetimen birge mundaı faktilerdi anyqtaımyz. Máselen, biz patrýldik polıtsııa qyzmetkerlerin ustadyq. Olar esirtkini jasyryp ketýshilermen baılanysty bolǵan. Eger bizde kúdik bolsa, tekseris júrgizemiz. Qandaı da bir polıtseıdiń esirtki qylmysymen baılanysy bolsa, biz ony jaýapqa tartamyz. Eger bizde onyń osyndaı qylmystarmen endi aınalysa bastap jatqany týraly málimet bolsa jáne ol naqty dáleldenbegen bolsa, onda biz qaýipsizdik qyzmetimen birge sheshim qabyldaımyz. Janama qatysy barlardy qupııa qaýlymen jumystan bosatamyz», - dedi Rýstam Ǵazızov depýtattar saýalyna jaýap bere otyryp.

Onyń málimdeýinshe, polıtsııa organdary esirtki qylmystaryn ashýda ІT mamandardyń qyzmetine kóp júginedi. Óıtkeni, uıymdastyrýshylar «sıntetıkany» ózge elderde otyryp, ınternet-dúkender arqyly saýdalaıdy. Al, Qazaqstanda tek esirtkini jasyryp ketetinder men ony jetkizetinder ǵana jumys isteıdi.