Elordalyq oqýshylarǵa 40 myń teńgeden kómek berilmek

NUR-SULTAN. QazAqparat – «Nur-Sultan ákimi Altaı Kólginov jańa oqý jylyna daıyndyq jaıynda aıtyp berdi, dep habarlaıdy QazAqparat tilshisi.

«Mektepterdiń daıyndyǵymen aınalysýdamyz. Árıne, oqytý sharalary balalarǵa, pedagogtarǵa qaýipti bolmas úshin qashyqtan oqytý arqyly iske asyrylady. Bizde 200 myńnan astam oqýshy bar. Alaıda bastaýysh synyp oqýshylaryna kezekshi synyptar ashylady. Birinshi synypqa 25 myńǵa jýyq bala barady», - dedi elorda ákimi «Astana» telearnasyna bergen suhbatynda.

Onyń sózine qaraǵanda, 1,5 mıllıonǵa jýyq oqýlyq satyp alyndy. Oǵan 2,3 mıllırd teńge bólindi. Kitaptardyń basym bóligi jetkizildi.

Sonymen qatar, tabysy az otbasylardyń balalaryna mektep formasyn alyp berý kómegi jasalady. Ótken jyly mektep quraldaryn satyp alýǵa bólingen soma 30 myń teńge boldy. Bıyl ol 40 myń teńgege deıin artty.

Ákimdik málimetinshe, eger otbasynda 3-4 baladan bolsa, onda ár balaǵa 40 myń teńgeden bólinedi. Bul maqsatqa bıýdjetten 680 mln teńge eskerilgen, bul ótken jylmen salystyrǵanda eki ese kóp. Sonymen qatar, az qamtylǵan otbasylarǵa basqa da áleýmettik kómek kórsetiledi.