Elordalyq oqýshylar halyqaralyq Jáýtikov olımpıadasynda 11 medal jeńip aldy

NUR-SULTAN. QazAqparat - 8-14 qańtar aralyǵynda Almatyda XVI Halyqaralyq Jáýtikov olımpıadasy ótti. Onyń qorytyndysy boıynsha Nur-Sultan qalasynyń oqýshylary 11 medaldy ıemdendi, dep habarlaıdy QazAqparat elorda ákimdiginiń resmı saıtyna silteme jasap.

Halyqaralyq Jáýtikov olımpıadasy - Qazaqstan, Reseı, Bolgarııa, Rýmynııa, Grýzııa jáne basqa elderden kelgen fızıka-matematıka baǵytyndaǵy mektep oqýshylarynyń bilimin baǵalaıtyn komandalyq jarys.

Olımpıadanyń ereksheligi – fızıka, matematıka, ınformatıka pánderi boıynsha tapsyrmalardyń orys, qazaq jáne aǵylshyn tilderinde berilýinde. Árbir komanda quramy 3 matematık, 2 fızık, 2 ınformatıkten turady.

Bıyl dástúrli olımpıadaǵa álemniń 21 elinen 599 oqýshy qatysty. Olımpıada qorytyndysy boıynsha Nur-Sultan qalasynyń komandasy joǵary nátıje kórsetti.

Altyn medaldi matematıka páninen «NURORDA» lıtseıiniń 11-synyp oqýshysy Bıbigúl Konkaeva jeńip aldy. Al daryndy balalarǵa arnalǵan «Bilim-ınnovatsııa lıtseıiniń» oqýshylary Danat Dúısembekov, Sam Fetýddah, Marlen Raýshanov, Beksultan Ábdikárimov kúmis medalge ıe boldy.

Qola medaldi atalmysh oqý oryndarynyń oqýshylary Abylaı Ashken, Nurlybek Taýbaqabyl, Amanbol Qanatuly, Jeńis Álibı, Eldar Qusdavletov, Asanáli Rahmetolla qanjyǵasyna baılady.