Elordalyq qutqarýshylar jolda qalǵan júkti áıeldi perzenthanaǵa jetkizýge kómektesti

NUR-SULTAN. QazAqparat - Nur-Sultan qalalyq tótenshe jaǵdaılar departamentiniń 4 qyzmetkeri Qorǵaljyn tas jolynda boranda qalǵan qala turǵyny Kamal Qonysbaevany perzenthanaǵa jetkizýge járdem berdi, dep habarlaıdy QazAqparat qala ákimdiginiń resmı saıtyna siltememen.

Atalmysh oqıǵa 27 qańtar kúni tańǵy 6.00 shamasynda Qorǵaljyn tasjolynda bolǵan. Aı-kúni jaqyndaǵan qala turǵyny Kamal Qonysbaeva balalaryn qala syrtynda turatyn ata-anasynyń úıine aparyp, ertesi elordaǵa qaraı jolǵa shyǵýdy josparlaǵan. Biraq, 26 qańtar kúni túnde tolǵaǵy bastalǵan kelinshek joldasymen birge tasjoldyń jabylǵanyna qaramastan jolǵa shyqqan.

Kóp uzamaı olar «102» qyzmetine habarlasyp kómek suraǵan. Qalalyq TJD qyzmetkerleri J.S Ábdirahmanov, A.B Rahmetov, N.A Esim jáne A.Z Zakarıanov jabyq tasjolmen júrip, júkti áıeldi qalalyq jedel medıtsınalyq járdem qyzmetiniń brıgadasyna tapsyrdy.

«Tańǵy 7.30-dar shamasynda keldik. Tolǵaǵym jıi bolyp jatqan soń jolda bosanatyn shyǵarmyn dep oıladym. Biraq, tótenshe jaǵdaılar, jedel járdem jáne osy perzenthananyń qyzmetkerleriniń arqasynda barlyǵy sátti aıaqtaldy. Barlyǵyna alǵysym sheksiz»,- deıdi tórtinshi balasyn qushaǵyna basqan Kamal Qonysbaeva.

Jedel járdem qyzmetkerleri T.A. Abdıloev pen A.A. Spanalıev kelinshekti №1 kópbeıindi qalalyq aýrýhanasynyń akýsherlik bólimine tańǵy saǵat 7.30 shamasynda jetkizgen.

«Kamaldyń jáne náresteniń jaǵdaıy jaqsy. 27 qańtar kúni keshki 17.00 shamasynda bosandy. Bári sátti ótti. Búgin úıine shyǵaramyz. Ár balanyń aman-esen dúnıege kelýi - biz úshin de úlken qýanysh. Bul - bizdiń jumysymyz», - deıdi perzenthananyń joǵary bilikti akýsher dárigeri Sergeı Lı.