Elordalyq kópbalaly otbasylarǵa jalǵa baspana berý kezinde zańsyzdyqtar tirkelgen

NUR-SULTAN. QazAqparat – El astanasyn damytýǵa bólingen qarajattyń ıgerilýine aýdıt júrgizgen Tekserý komıssııasy alǵashqy qorytyndylardy jarııalady, dep habarlaıdy QazAqparat tilshisi.

Komıssııanyń tóraǵasy Imanjúsip Aqpombaev aýdıt Esep komıtetimen birlesip júrgizilgenin aıtady.

«Nur-Sultan qalasyn damytýǵa, onyń ishinde daǵdarysqa qarsy is-sharalar boıynsha bólingen memlekettik qarajattyń paıdalanylýyna memlekettik aýdıt júrgizdik. Aýdıt mynadaı problemalar men kemshilikterdi kórsetti: kóp páterli turǵyn úı keshenderin paıdalanýǵa qabyldaý kezinde qurylys týraly zańnama buzylǵan. «Nurly jer» memlekettik baǵdarlamasy boıynsha az qamtylǵan jáne kóp balaly otbasylar úshin jalǵa beriletin páterlerdi satyp alý kezinde memlekettik baǵdarlamanyń 5,1-tarmaǵyn buzý baıqaldy. Jalpy somasy 254,2 mln.teńgege 13 páter satyp alynǵan», - deıdi komıssııa basshysy.

Imanjúsip Aqpombaev 2020 jyldyń 1 shildesindegi jaǵdaı boıynsha qalalyq qurylys basqarmasynyń moınynda 5 bıýdjettik baǵdarlama boıynsha 7,4 mlrd teńge qaryz bolǵanyn atady.

«Turǵyn úı qurylysynyń problemalyq nysandaryn aıaqtaýmen aınalysatyn «Elorda qurylys kompanııasy» JShS-ndegi aýdıt birqatar kemshilikti kórsetti. Tórt nysannyń qurylysyna bólingen 3 mlrd teńgeni birlesip paıdalaný týraly kelisimshartsyz ıgerý faktisi tirkeldi», - dedi tekserý komıssııasynyń tóraǵasy.