Elordalyq qart maıdanger Uly Jeńistiń 70 jyldyǵyna oraı Máskeýdegi sherýge qatysýǵa nıetti

ASTANA. QazAqparat - Belarýs maıdanyna qatysqan Uly Otan soǵysynyń ardageri Minaıdar Boranbaev Uly Jeńistiń 70 jyldyǵyna oraı Máskeýdegi saltanatty sherýge qatysýǵa nıetti. Bul týraly ol búgin QazAqparat tilshisine bergen suhbatynda aıtty.

Aıta keteıik, M.Boranbaev 1944 jyly 17 jasynda maıdanǵa alynǵan bolatyn. Ol Belarýs jerinde ótken soǵystarǵa qatysyp, Eýropanyń birqatar qalalaryn basqynshy fashısterden azat etý urystarynda erlikpen shaıqasty.

«Biz bul Uly Otan soǵysynan aman oraldyq. Bul qasiretti soǵysty adam balasynyń basyna bermesin. Men ózim Qostanaı oblysynan edim. Amangeldi aýdanynan attanǵan 500 jigittiń ishinen kóbisi oralmady. Olardyń barlyǵy elimiz úshin, bolashaǵymyz úshin keýdesin oqqa tosty. Jalpy qazaq halqy osy qan maıdanda úlken erlik kórsetti. Aldaǵy jyly Uly Jeńistiń 70 jyldyǵy kele jatyr. Osy oraıda jastardy otansúıgishtikke tárbıeleýge aıryqsha mán berý kerek dep oılaımyn», - deıdi qart maıdanger.

Ardager óz sózinde Uly Jeńistiń 70 jyldyǵyna oraı Máskeýdegi sherýge qatysýǵa daıyndalyp jatqandyǵyn atap ótti.

«Saltanatty sherýge nemeremmen birge baramyn. Densaýlyq jaǵdaıym durys bolyp jatsa, bul sharaǵa mindetti túrde baramyn dep josparlap otyrmyn», - dedi M. Boranbaev.

«Jalpy osy bıylǵy 2015 jyl Qazaqstan úshin tabysty bolsyn. Elbasymyz aman bolsyn! Prezıdentimiz Qazaqstannyń damýy jolynda úlken jumystardy atqarýda. Elimizdiń ál-aýqaty jaqsara bersin. Elimizdiń berekesi men birligi arta bersin», - degen tilegin bildirdi qart maıdanger.