Elordalyq qalyńdyqtar máhirge kóbinde ne suraıdy

ASTANA. QazAqparat – Sońǵy birneshe aıda áleýmettik jelilerde máhirge túrli qymbat syılyq suraǵan qalyńdyqtardyń vıdeolary tarady. Onda keıbiri sheteldik markaly kólik surasa, endi biri máhirin baspanamen alǵysy keletinin málimdegen. Osy oraıda, «Áziret Sultan» meshitiniń naıb ımamy Baqytjan Ótkelbaev qazirgi elordalyq qalyńdyqtar máhirge kóbine ne suraıtynyn jáne onyń berýdiń mańyzy týraly aıtyp berdi.

«Paıǵambarymyzdyń: Máhirdiń az bolǵany – abzaly, degen sózi bar. Kóp jaǵdaıda bizge keletin juptar máhirge altyn alqa, júzik, syrǵa, bilezik surap jatady. Kólik suraıdy keıbireýleri. Biraq olar jaǵdaıy bar adamdar. Olardyń alyp bere alatyny kórinip turady. Aldyn ala kelisip keledi negizi qyz ben jigit. Sonymen qatar, telefon, tigin mashınasy, kompıýter surap jatatyndar bar. Kıim suraıtyndar da kezdesedi. Máselen, kún sýyta bastaǵanda nekesin qıdyrtatyn qalyńdyqtar kóbine ton suraıdy. Arasynda eshteme kerek emes, tek joldasym adal bolsa boldy, degen talap qoıatyndar bolady. Degenmen ol rýhanı dúnıe. Al máhir materıaldyq, qarjylaı jáne zattaı beriledi. Ol rýhanı dúnıege jatpaıdy», - dedi Baqytjan Ótkelbaev.

Budan bólek, «Áziret Sultan» meshitiniń naıb ımamy jalpy máhir berýdiń máni men mańyzdylyǵyna toqtaldy.

«Máhirdi berý – ıslam sharıǵaty boıynsha mindet. Bul qyzdyń quqyǵyn qorǵaý bolyp esepteledi. ıAǵnı, kepildik. Eger erdiń basyna qandaı da bir jaǵdaı tússe, onda áıel azamaty sol máhir arqyly ómirin súrip, jalǵastyryp ketýi tıis. Ol áıeldi qorǵaý úshin sharıǵattyń qoıǵan talaptary. Qandaı jaǵdaı bolmasyn, áıelde kepildik zat bolýy tıis. Ony áıel qalasa qaıtadan joldasyna tabystaı alady. Sondaı-aq, ony óziniń ata-anasyna nemese týystaryna bere alady. Osy oraıda, ýaqytyn kelisip alý mańyzdy. Máselen, úlken máhir suraıtyn bolsa, onda ony osynshama jylǵa nemese ómiriniń sońyna deıin alyp berýge ýádelese alady. Alla saqtasyn, biraq ajyrasqanǵa deıin de alyp berýine bolady.

Jalpy meshitke kelgen kezde biz túsindiremiz. Keıbiri tipti máhirdiń ne ekenin bilmeıdi. Eger jigittiń jaǵdaıy kelmeıtin bolsa, onda ony qarap, qalyńdyq ekeýin kelistirip, keńes aıtamyz», - dep atap ótti Baqytjan Ótkelbaev.

Naıb ımamnyń aıtýynsha, paıǵambarymyzdyń zamanynda máhirdiń eń az quny 10 dırham bolǵan. Bul somaǵa ol kezde eki qoı satyp alýǵa bolatyn desedi. Osyǵan sáıkes, qazirgi tańda máhirdiń eń az mólsheri 2 qoıdyń qunynan kem bolmaýy kerek. Al onyń eń qymbat ári shekti baǵasy joq.

Foto: alashainasy.kz