Elordalyq ІІD bastyǵy tergeý qupııasyn buzýǵa májbúr bolyp otyrǵandaryn aıtty

ASTANA. QazAqparat - Astana qalalyq Іshki ister departamentiniń bastyǵy  Marat Qojaev máslıhat depýtattaryna elordalyq polıtseıler otyratyn ǵımarattardyń  múshkil jaǵdaıy týraly málim etti, dep habarlaıdy QazAqparat «Vechernıaıa Astana» gazetine silteme jasap.

Marat Qojaevtyń atap ótýinshe, polıtseılerdiń jumysynyń kórsetkishine eńbek etýge jasalǵan jaǵdaı da áser etedi. Máselen, búginde ІІD qyzmetkerleri qala boıynsha 25 ǵımaratta ornalasqan, al qajettilik 64 mekemeni quraıdy. Jýyrda taǵy 5 mekeme bólingen, biraq bul jalpy ahýaldy esh ózgertpegen.

«Infraqurylymnyń Astanadaǵydaı kúıi eshbir óńirde joq. Bizde ІІD 1906 jyly salynǵan ǵımaratta otyr. Árbir qımyldan tóbedegi sylaq ústimizge úgitilip túsedi. «Saryarqa» aýdandyq bólimi káriz qubyrlary ótip jatqan jertólede ornalasqan. Ǵımarat birde-bir ret jóndeýden ótpegen. Munda 735 qyzmetkerge barlyǵy 25 kabınet bar. Osyndaı jaǵdaı «Almaty» aýdandyq ishki ister basqarmasynda da bar. Onda 40 qyzmetker akt zalynda ornalasýǵa májbúr. Bul rette, ústelderdiń arasyn bólip turatyn qalqalar joq. Polıtseıler osyndaı jaǵdaıda ustalǵandardan jaýap alady. Munda tergeý qupııasy týraly aıtýdyń qajeti de joq. Osydan keıin baryp, qylmystyq isterdiń málimetteri áleýmettik jelige qalaı shyqqanyna tańǵalamyz», - dedi ol.

Depýtattar bul máseleni qala bıliginiń aldynda kezekti ret kóterýge jáne máslıhat sessııasynyń otyrysyna shyǵarýǵa ýáde berdi.

Sondaı-aq turaqty komıssııa otyrysynyń barysynda bazarlar, meshitter men shirkeýlerdiń janynan jıi kezdestirýge bolatyn tilemsekterdiń máselesi kóterildi. «Beıáleýmettik toptardyń da óz quqyqtary bar. Biz olardy jylyna bir ret jáne úsh saǵattan artyq ýaqytqa ustaı almaımyz. Keıin keshirimimizdi surap, qaıta jiberýge mindettimiz», - dep atap ótti ІІD bastyǵy. Onyń aıtýynsha, polıtseıler bul áleýmettik túıitkildi óz betterimen sheshýge qaýqarsyz.

Budan bólek, máslıhat depýtattary Astana mańyndaǵy kentterde qyzyp jatqan «jabaıy saýda-sattyq» problemasyn da kóterdi. Depýtat Erkeǵalı Esenjolovtyń  aıtýynsha, asfalttyń ústinde kómir de, qurma men shujyqtar da satylyp jatyr.

«Promyshlennyı turǵyn alabynda túrli sıpattaǵy quqyqbuzýshylyqtarǵa qatysty 50-den astam aryz tústi. Alaıda, olardyń tirkelgen, ne tirkelmegenin bilmeımin. Bul rette, olardyń birde-biri qanaǵattandyrylǵan joq. Kenttiń turǵyndarymen aıyna eki ret kezdesemin. Men olardyń betine qaraýǵa uıalamyn, sebebi ylǵı bir máselelerge shaǵymdanady. Adamdar «jabaıy saýda» men túngi saǵat ekige deıin mýzyka tyńdaıtyn zańsyz taksıshiler týraly aıtady», - dedi ol.

Depýtat Astana qalalyq ІІD jergilikti polıtsııa qyzmetiniń bastyǵy Baqytjan Malybaevtan óz quzyreti sheńberinde atalmysh jaǵdaıdy sheshýdi surady.

Halyq qalaýlysynyń sózinshe, mundaı jaǵdaı Kúıgenjar, Ýchhoz jáne Temirjol kentterinde de baıqalýda.