Elordalyq fotograf: Sýretter arqyly koronavırýsty jeńetinimizge senim uıalatqym keldi

NUR-SULTAN. QazAqparat – Koronavırýs indeti naýqastardy ajaldan aman alyp qalý jolynda kún demeı, tún demeı arpalysqan dárigerlerdiń erligin kórsetti. Aq halatty abzal jandarǵa alǵystaryn bildirip jatqandar da az emes. Kásibı fotograf Rýslan Mazýnın bolsa, medıtsına qyzmetkerlerine erekshe tásilmen alǵys bildirdi. Ol qazirgi ýaqyttaǵy naǵyz keıipkerlerdi halyqqa tanytý maqsatynda dárigerlerdiń sýretin elordadaǵy kópirdiń jaıaý adam kóp júretin tusyna ornalastyrǵan.

Rýslan Mazýnın kásibı fotosýretke túsirýmen 12 jyldan aınalysyp keledi. Koronavırýs órship turǵan kezde de jumysyn toqtatpaǵan. Іndetpen kúres aılarynda ol dárigerlerdiń qýanyshyn da, qaıǵysyn da, naýqastardyń ómirin qutqaryp qalý úshin janyn aıamaǵan sátterine kýá bolǵanyn aıtty. Rýslan zamanaýı frantsýz sýretshisi JR Parıjdegi opera teatrynyń qasbetine dárigerlerdiń sýretin salǵanyn kórip, shabyt alǵan jáne ózi de dárigerlerge alǵys aıtýdy jón dep tapqan.

«Men eshqandaı erekshe nárse oılap tapqan joqpyn. Osyǵan uqsas nárseni shetelden kórgenmin. Meni sheteldegi adamdar dárigerlerge alǵysyn qalaı jetkizetini tań qaldyratyn. Sol kezde «Biz nege osylaı erekshe yqylas bildire almaımyz?» dep oıladym. Sońǵy alty aıda bolǵan jaǵdaı ár adamnyń júreginde iz, jazylmas jara qaldyryp ketkeni sózsiz. Biraq men úmittiń nyshany retinde, bári jaqsy bolatynyna sený retinde dárigerlerdiń kóńildi sátterin sýretke túsirip alǵym keldi. Eki apta buryn Nur-Sultan qalasy ákimdiginiń ShJQ «Kópsalalay medıtsına ortalyǵyna» baryp, fotosýret túsirýdiń sáti tústi. Jumys barysynda men túsirgen ár sýret medıtsına qyzmetkerleriniń kóńilinen shyqqanyn qaladym. Sanıtar, medbıke, reanımatolog, feldsher, ınfektsıonıst, dáriger – olardyń bári adam janyn arashalap qalý úshin kúresedi», - deıdi fotograf Rýslan Mazýnın.

Ol fotosýretterdi túsirip bolǵannan keıin shaǵyn vıdeo jasap, Іnstagram paraqshasynda bólisti jáne «Jýrnaldyń muqabasynda osyndaı naǵyz keıipkerler turýyna qalaı qaraısyzdar?» dep jazdy.

Bul sózder ár qazaqstandyqtyń kóńiline qýanysh uıalatty. Oqyrmandar onyń vıdeosymen bólisip, pikir jazyp, lúpil basyp, aqyry demeýshilerdiń, dálirek aıtqanda qurylys kompanııasynyń, polıgrafııa jáne elordalyq ákimdiktiń nazaryn aýdardy. Olar fotograftyń oıyn júzege asyrýǵa qol ushyn sozyp, fotokórme uıymdastyryp berdi.

«Fotosýretten shynaıy kúlimsirep turǵan dárigerlerdi kóresizder. Shyn máninde ártúrli emotsııany kórýge bolady. Keı dáriger «Kúlimsiremeı-aq túsýge bola ma?» dep surady. Aǵa býyn dárigerler fotoǵa baıypty, salmaqty qalypta túsip úırenip qalǵan. Olar júrgen sala mańyzdy jáne jaýapkershiligi mol bolǵandyqtan táýlik boıy eńbek etedi, sáıkesinshe jıi kúlimsireýge ýaqyttary ja joq shyǵar. Men bar kúsh-jigerimdi salyp, olardyń júzindegi qýanysh lebi osyndaı qıyn-qystaý kezeńde ár qazaqstandyqtyń júregine úmit otyn syılaıtyndaı etip fotosýretke túsirdim», - deıdi fotograf.

«Rızamyz» dep atalatyn fotokórmede medıtsına qyzmetkerleriniń 101 fotosýreti qoıylǵan. Fotograf ıdeıasy qazaqstandyqtar tarapynan qoldaý tapqany úshin shyǵarmashylyq adamy retinde qýanyp qalǵan. Onyń Instagram paraqshasyna jarııalaǵan vıdeosyna alǵys aıtý sıpatyndaǵy pikirler kóp jazylǵan.

«Fotosýretter – biz syrt etkizip túsirip úlgergen ómirdiń bir bólshegi, bir sáti. Medıtsına qyzmetkerleriniń fotosýretteri – koronavırýs indetin jeńemiz degen úmit», - deıdi ol.

Dárigerler fotografqa eńbegin elep-eskergeni úshin rızashylyqtaryn bildirdi.

«Buryn bul óte mártebeli mamandyq bolǵan. Dárigerler qazirgi qoǵamda da bedelin joǵaltyp almaǵanyn qalaımyn. Balalar óskende dáriger bolýdy armandap, eresek býyn bul mamandyqqa erekshe qurmetpen qaraǵany jaqsy emes pe. Keıde oqyrmandar «Dáriger bolý qandaı keremet», «Dárigerler – beıbit ómirdiń batyrlary» degen sııaqty pikir jazady. Demek, meniń maqsatym oryndalyp keledi», - deıdi fotograf.

Ol bul jetistigimen toqtap qalǵysy kelmeıtinin, osyndaı fotokórmeler elimizdiń basqa da óńirlerinde uıymdastyrylsa jaqsy bolatynyn aıtty.