Elordalyq dárigerler tisin julǵannan keıin jaǵdaıy kúrt nasharlaǵan qyzdyń ómirin saqtap qaldy

ASTANA. QazAqparat - Astana qalasynyń № 2 kópsalaly aýrýhanasynyń dárigerleri 28 jastaǵy qyzdyń ómirin saqtap, onyń aǵzasyndaǵy irińdeý protsesin toqtatty. Oǵan bir jarym aıda úsh operatsııa jasaldy, dep habarlaıdy QazAqparat elorda ákimdiginiń resmı saıtyna silteme jasap.

Ol 11 qarasha kúni tamaq aýrýymen dárigerlerge júgindi. Dárigerler aýyr irińdi-qabyný aýrýyn anyqtady. Qyzdyń jaǵdaıy óte aýyr boldy. Problemanyń basy tis julýdan bastalǵan, ol aýyz qýysynyń túbine, sodan keıin moıynnyń tereń bólikterine ótip ketken. Ári qaraı, irińdi protsess keýdege túsip ketken.

Jaq-bet hırýrgııasy bóliminiń meńgerýshisi Dáýren Ábildın mundaı jaǵdaıdaǵy patsıentter 90% jaǵdaıda tiri qalmaıtynyn aıtty.

«Qyzdyń aman qalyp, saý bolýy — úlken jetistik! Jas qyzdyń denesine túsip ketken irińdi tolyǵymen toqtata alǵanymyz — kúndelikti birlese atqarǵan qajyrly eńbegimiz», — dep atap ótti Anestezıologııa, reanımatsııa jáne qarqyndy terapııa bólimshesiniń meńgerýshisi Azamat Matkenov.

Bir jarym aı ishinde jas qyzǵa 3 ota jasaldy, kúndelikti protsedýralar, tańý men tynys alý jattyǵýlaryn jasaýǵa májbúr boldy. Sol sııaqty ony arnaıy tamaqtandyrý qajet boldy. Іrińniń áserinen qyz tolyq qalpyna kelgenge deıin ózdiginen jutynyp, tamaq ishe almady.

Naýqasty qutqarýǵa jaq-bet, keýde jáne irińdi hırýrgııa, reanımatsııa jáne anestezıologııa bólimsheleriniń, endoskopııalyq bólimsheniń dárigerleri, klınıkalyq farmakologtar, pýlmonologtar jáne reabılıtologtar qatysty.

Qazir Zarýdy aýrýhanadan shyǵýǵa jáne jańa jyldy otbasymen úıinde qarsy alýǵa daıyndalyp júr.

Foto: gov.kz