Elordalyq bar karantındi qaıta-qaıta buzyp, qonaqtarǵa qorqor usynǵan

NUR-SULTAN. QazAqparat - Ótken táýlikte, ıaǵnı 8 shilde kúni elordanyń monıtorıng toptary kásipkerlik nysandary arasynan 6 karantın buzýshyny anyqtady, dep habarlaıdy QazAqparat Nur-Sultan ákimdiginiń resmı saıtyna silteme jasap.

Qalanyń keıbir mekemeleri shekteý sharalaryn elemeı, betperde taǵý, belgilengen jumys rejımi sekildi talaptardy júıeli túrde buzyp keledi.

Esil aýdanynda ornalasqan «Mıata» laýndj-barynda kelýshilerge qorqor shegý qyzmeti usynyldy. Bul mekeme buǵan deıin de birneshe ret shekteýdi saqtamaǵan. Sonymen qatar, mekemede jumys rejımi men áleýmettik qashyq saqtalmaǵan, tekserý kezinde barda shamamen 25 adam boldy.

Belgilengen ýaqyttan keıin «Taǵam» ashanasy da jumys istedi. Sonymen qatar qyzmetkerler maska rejımin saqtamaǵan.

Karantın buzǵandar «Aura Club Alanya» túngi klýbynda da anyqtaldy.

Jumys rejımin saqtamaǵany úshin ákimshilik jaýapkershilikke Baıqońyr aýdanyndaǵy «Panaehalı» bary, «XALVA» meıramhanasy jáne Saryarqa aýdanyndaǵy «Golkıper» restobary tartyldy.

Tártip buzýshylarǵa qatysty jınalǵan materıaldar tıisti sharalar qabyldaý úshin aýdandyq sanıtarlyq-epıdemıologııalyq baqylaý basqarmasyna tapsyryldy.

Esterińizge sala keteıik, qalada epıdemıologııalyq ahýal áli de qubylmaly. KVI ınfektsııasyn juqtyrǵandar sany artyp keledi.

Qala turǵyndary men qonaqtary, kásipkerlik nysandary sanıtarlyq normalar men shekteý sharalaryn qatań saqtaýy tıis.