Elordalyq balalar qandaı mádenı jáne sporttyq is-sharalarǵa bara alady

NUR-SULTAN. QazAqparat – Elordada jeltoqsan aıy «Nur-Sultan qaıyrymdy qala» uranymen ótýde. Osyǵan baılanysty qala ákimdigi az qamtylǵan jáne kóp balaly otbasylardyń balalaryna, erekshe qajettilikteri bar, sondaı-aq jetim balalarǵa arnalǵan bıznes ókilderiniń qoldaýymen kóptegen qaıyrymdylyq jáne áleýmettik is-sharalar ótkizedi. Jalpy bul sharalarmen shamamen 17 000 balaqaı qamtylady, dep habarlaıdy qala ákimdiginiń resmı saıty.

Jeltoqsan aıynda barlyǵy 5690 adamdy qamtıtyn 45 mádenı is-sharalar (teatrlar men kontsertter), 3710 adamdy qamtıtyn 10 sporttyq is-sharalar, 6000 astam adamdy qamtıtyn 49 kópshilik is-sharalar, sondaı-aq 2150 adamdy qamtıtyn 10 jańa jyldyq shyrsha ótkizý josparlanýda. Elorda ákimdiginiń málimetinshe, 2019 jylǵy 19 qarasha men 4 jeltoqsan aralyǵynda jalpy 5000 balany qamtıtyn 30 shara ótkizildi.

Osylaısha, búgin keshke «Barys Arena» muz saraıynda 2019-2020 jyl maýsymyndaǵy QHL chempıonaty aıasynda «Barys» jáne «Iokerıt» komandalary arasynda shaıbaly hokkeı boıynsha match ótedi. Oıyndy az qamtylǵan jáne kóp balaly otbasylardan shyqqan 50-ge jýyq bala tamashalaı alady.

Erteń, ıaǵnı 5 jeltoqsanda elordalyq kınoteatrlardyń birinde balalarǵa «Muzdy ólke-2» mýltfılmi kórsetiledi. 6-8 jeltoqsan aralyǵynda «Alaý» muz saraıynda jas sport kórermenderi konkı tebý sportynan Álem kýbogynyń kezeńin tamashalaı alady. 7 jeltoqsanda balaqaılar «Astana» kontsert zalynda «Jyr terme» respýblıkalyq festıvalin kóre alady. Sol kúni «Saryarqa» velotreginde 1000 bala 2019-2020 jj. maýsymynyń VTB Biryńǵaı lıgasy aıasynda «Astana» BK – «Nıjnıı Novgorod» BK komandalary arasynda basketbol boıynsha matchqa qatysady.

Sonymen qatar, elordalyq teatrlar jas astanalyqtardy balalar spektaklderi men ertegilerin kórýge shaqyrady. Odan bólek, balalarǵa Táýelsizdik kúnine arnalǵan birqatar is-sharalar uıymdastyrylady. Atap aıtsaq, 11 jeltoqsanda balalar úshin Tuńǵysh Prezıdent – Elbasy murajaıyna ekskýrsııa júrgiziledi. Ertesi kúni olar «Nomad City Hall» teatrynda ótetin Sáken Seıfýllınniń, Beıimbet Maılın men Іlııas Jansúgirovtiń poezııalyq keshine qatysady. Al 14 jeltoqsanda 400 balaqaı «Astana» kontsert zalynda Qazaqstan Respýblıkasynyń Táýelsizdik kúnine arnalǵan saltanatty kontserttiń kórermeni bola alady. 14 jáne 15 jeltoqsanda elordalyq qýyrshaq teatry 300 balany «Atameken» spektaklin kórýge shaqyrady.

Ujymnyń «Malıfısentanyń sýyq júregi» atty qoıylymyn 17-30 jeltoqsan aralyǵynda aqysyz negizde 2600 kishkentaı kórermen tamashalaıdy. 15 jáne 16 jeltoqsanda olar úshin qyzyl eki qabatty avtobýsta qala boıynsha ekskýrsııa uıymdastyrylady. Sonymen qatar, 18 jeltoqsanda balalar elimizdiń basty shyrshasyn jaǵý rásimine qatysady. 24 jáne 25 jeltoqsanda 200-300-ge jýyq bala Prezıdent shyrshasyna jáne qala ákiminiń shyrshasyna qatysa alady. Sondaı-aq, 20-25 jeltoqsan aralyǵynda ótetin aýdan ákimderiniń jańa jyldyq shyrshalarymen 1600 balany qamtý josparlanýda. 20 jeltoqsanda qalalyq alańda jáne qala boıynsha 28 alańda muz qalashyqtary ashylady.

Sol rette syrǵanaqtar men muz aıdyndarynda jappaı syrǵanaý uıymdastyrylady. Bul is-sharaǵa 2800 jetim jáne az qamtylǵan otbasynan shyqqan balalardy shaqyrý josparlanyp otyr. 21 jeltoqsan men 5 qańtar aralyǵynda elordalyq tsırk Jańa jyldyq tsırk ertegisin kórýge shaqyrady. Qoıylymdy 500 bala tegin tamashalaý múmkindigine ıe. Sonymen qatar, 200 bala 26 jeltoqsanda «Astana» kontsert zalynda ótetin «Jańa jylǵa jańa án» atty jańa jyldyq kontsertine qatysady.