Elordalyq áýejaıda Ashyq qosymshasy engiziledi

NUR-SULTAN. QazAqparat – Nursultan Nazarbaev halyqaralyq áýejaıynda 10 mamyrdan bastap Ashyq qosymshasy arqyly jolaýshylarǵa ruqsat berý jobasy engizilýde, dep habarlaıdy QazAqparat halyqaralyq áýejaıdyń baspasóz qyzmetine silteme jasap.

Jobany 12 mamyrdan bastap tolyqqandy iske qosý josparlanyp otyr. Mobıldi qosymshany QR Densaýlyq saqtaý mınıstrliginiń jalpy bazasymen ıntegratsııalaý arqyly jolaýshynyń qazirgi ýaqytta vırýstyń tasymaldaýshysy ma, joq pa degen mártebesi aıqyndalady. ıAǵnı jolaýshylar men áýe kompanııalary men áýejaı qyzmetkerleriniń qaýipsizdigi úshin qabyldanyp jatqan sanıtarııalyq sharalarǵa (maska, termometrııa, jeldetý jáne t.b.) qosymsha baqylaý qamtamasyz etiledi.

Termometrııa (dene qyzýyn qashyqtan ólsheý) Covid-19 belgileriniń birin anyqtaýǵa kómektesedi (dene temperatýrasynyń joǵarylaýy), al Ashyq qosymshasy jolaýshylar men qyzmetkerlerge qosymsha qaýipsizdik kepili bolmaq.

Osyǵan baılanysty, barlyq jolaýshylardan áýejaıǵa kelgenge deıin aldyn ala qosymshany júktep alyp, óz mártebesin tekserý suralady. Termınal ǵımaratyna sary jáne qyzyl mártebeli jolaýshylarǵa kirýge ruqsat berilmeıdi. Reıske jiberilmegen jaǵdaıda, qarajatty qaıtarý boıynsha suraqtardy áýe kompanııalary qarastyrady.

Esterińizge sala keteıik, 17 qańtardan bastap Qazaqstan Respýblıkasynyń tsıfrlyq damý, ınnovatsııa jáne aeroǵarysh ónerkásibi mınıstrligi jáne QR Densaýlyq saqtaý mınıstrligi tapsyrys bergen Ashyq mobıldi qosymshasy shaǵyn jáne orta bıznestiń jeke nysandaryna qoljetimdilikti qamtamasyz etti.