Elordalyq áýejaı ýaqytsha jabylý kúnderin jarııalady

ASTANA. QazAqparat - Elordalyq áýejaı jumys ýaqytynda ushý-qoný jolaǵynyń jabylý kúnderin jarııalady, dep habarlaıdy QazAqparat.

Indýstrııa jáne ınfraqurylymdyq damý mınıstrliginiń málimetinshe, Astana halyqaralyq áýejaıynyń qyzmetkerleri ushý-qoný jolaǵyn rezeńke qaldyǵynan tazartady. Jumystar azamattyq avıatsııadaǵy áýeaılaqty qamtamasyz etý qaǵıdalary sheńberinde oryndalatyn bolady.

Erejege sáıkes, áýeaılaq qyzmetiniń mamandary jylyna eki ret ushý-qoný jolaǵyndaǵy rezeńke qaldyqtaryn alyp tastaýǵa mindetti. Mundaı jumystardy oryndaý UQJ-ny kem degende 4 saǵatqa jabýdy talap etedi.

Sonymen qatar, ushý-qoný eń az oryndalatyn kúnder aldyn-ala anyqtaldy. Bul - 31 mamyr men 7 maýsym kúnderi saǵat 13:20-dan 17:20-ǵa deıingi ýaqyt.

Aıtpaqshy, rezeńke qabattaryn ketirý jumystary arnaıy suıyqtyq pen şetka arqyly júzege asyrylady. Rezeńke qabattaryn alyp tastaý áýejaılarda josparly jumystar bolyp tabylady jáne ushý qaýipsizdigin qamtamasyz etý maqsatynda oryndalady.