Elordalyq ártister qala turǵyndary men qonaqtaryn erekshe quttyqtady

NUR-SULTAN. QazAqparat - Táýelsizdik merekesine oraı elorda turǵyndary men qonaqtary úshin erekshe tartý usynyldy. «Qazaqkontsert» memlekettik kontserttik uıymy Nursultan Nazarbaev halyqaralyq áýejaıymen jáne «Qazaqstan temir joly» Ulttyq kompanııasymen birlesip, merekelik is-sharalar keshenin uıymdastyrdy, dep habarlaıdy QazAqparat tilshisi.

Merekelik is-shara Nursultan Nazarbaev halyqaralyq áýejaıynan bastaý aldy. «Qazaqkontsert» uıymynyń «Astana mıýzıkl» teatry qala turǵyndary men qonaqtaryn mýzykalyq qoıylymmen qýantty. Teatrdyń talantty jastary uly Abaıdyń «Aıttym sálem, Qalamqas» ánin, «Kerim-aý aıdaı» atty belgili halyq ánin de shyrqady.

Táýelsizdik merekesine arnalǵan joba «Nurly jol» vokzalynda óz jalǵasyn tapty. «Astana mıýzıkl» ártisteri bul jerde barshaǵa tanymal «Atameken» ánin oryndap, kópshiliktiń yqylasyna bólendi. Temirjolshylardyń formasyn kıip mýzykalyq fleshmob bastaǵan ártister kórermenderdi tańǵaldyryp, erekshe áser qaldyrdy. Jolaýshylar da ánge qosylyp, patrıottyq sezimge bólendi.

Táýelsizdik meıramyn ulyqtaǵan joba barshaǵa merekelik kóńil-kúı syılap, elordalyqtardyń patrıottyq rýhtaryn kóterdi. Sondaı-aq «Qazaqkontsert» uıymy uıymdastyrǵan bul jobanyń áleýmettik mańyzy da zor. Qoǵamdyq oryndarda ótken osy erekshe quttyqtaýlar arqyly ártister mýzykalyq ónerdi barsha halyqqa qoljetimdi ete bildi.