Elordalyqtar Damubala.kz saıtynyń jumysyna shaǵymdanyp jatyr

<p>27 qyrkúıekte saǵat 13:00-de elordada Damubala.kz onlaın-platformasy arqyly balalardy tegin shyǵarmashylyq úıirmelerge tirkeý bastaldy.</p>

Alaıda qabyldaý ashylyp, arada birneshe mınýt ótken soń júıeden tehnıkalyq aqaýlar shyqqan. Buǵan qatysty ata-analar shaǵym túsirdi. Osyǵan baılanysty Astana qalalyq mádenıet basqarmasy túsinik berdi, dep habarlaıdy QazAqparat tilshisi.

Damubala.kz-tiń Instagram paraqshasynda ornalastyrylǵan jarııalanymnyń astyna ata-analar narazylyq bildirip, pikir qaldyrǵan.

Astanalyq Dilnár Dostyń aıtýynsha, tegin úıirmelerdegi oryndar birneshe mınýt ishinde taýsylǵan. Al saǵat 13:04-te saıt istemeı qalǵan.

«Saıttyń jumysynan kóńilim qaldy. Bir balamdy keshe, ekinshisin búgin tirkedim. Biraq saǵat 13:04-te bári qatyp qaldy. Oǵan deıin týý týraly kýáliginiń aqparatyn engizgen edim, degenmen toltyrǵan barlyq derekterim joǵalyp ketti. Eger istemese, onda bizge nege mundaı tirkeý týraly múmkindik usynady? Nelikten kóptegen olqylyq shyqty, saıt nege qatyp qalady?»,- dep máselesin jetkizdi elorda turǵyny.

Al, Astana qalalyq mádenıet basqarmasy bolsa aqparattyq júıe aýyr júktemege qaramastan, shtattyq rejımde jumys istegenin alǵa tartty.

«27 qyrkúıek saǵat 13.00-de Damubala.kz aqparattyq júıesi arqyly memlekettik shyǵarmashylyq tapsyrysty oryndaý aıasynda tirkeý júrgizildi. 40 mınýt ishinde bıýdjet bekitilgennen keıin bólinetin 7 500 vaýcherdi alýǵa ótinish qabyldandy», - dep málim etti vedomstvodan.

Ata-analar bul júıeni qaıta qaraý talabyn qoıyp otyr.

Aıta keteıik, 27 qyrkúıek kúni saǵat 20:00-de Damubala.kz arqyly sport sektsııalaryna jazylý bastalady.