Elordalyq «Jastar teatry» Pavlodarda ótken teatr festıvaliniń bas júldesin jeńip aldy
Pavlodarda Alash arysy Júsipbek Aımaýytovtyń 135 jyldyq mereıtoıyna arnalǵan «Ertis-Baıan» І respýblıkalyq teatr festıvali óz máresine jetti. 11 teatr, jalpy sany 288 akter qatysqan óner dodasynda begzada kórermen elimizdegi eń úzdik týyndylardy tamashalap, rýhanı lázzat aldy. Mádenı maıdannyń lebin sezindi.
Uıymdastyrýshy – Júsipbek Aımaýytov atyndaǵy Pavlodar oblystyq qazaq mýzyka-drama teatrynyń basshysy Arman Temirbek atap ótkendeı, festıval maqsaty – qazaq teatrlary arasynda tájirıbe almasyp, dostyqty nyǵaıtý, akterler men kórermen arasynda altyn kópir salý.
Qazaqstannyń eńbek sińirgen qaıratkeri, M.Áýezov atyndaǵy qazaq ulttyq drama teatrynyń dırektory Erkin Jýasbek bastaǵan qazylar alqasy barlyq spektakldi talqylap, ádil baǵasyn berýge tyrysty.
Óner báıgesinde Astanadan kelgen «Jastar teatrynyń» baǵy janyp, bas júldeni jeńip aldy. Atalǵan ujym rejısser ári akter Dáýren Serǵazınniń «Kúıeý bala» dramasymen qatysyp, kórermenniń ystyq yqylasyna bólendi. Al, pavlodarlyq Aımaýytov teatry («Rıchard ІІІ» tragıfars, rejısseri S.Levıtskıı) Pavlodar oblysy ákiminiń arnaıy júldesin ıelendi.
«Úzdik ansambl» nomınatsııasyna - Abaı atyndaǵy Abaı oblystyq qazaq mýzyka-drama teatry («Abaı aıtqan Eńlik-Kebek» tragedııasy, rejısseri J.Jumanbaı), «Úzdik rejıssýralyq sheshim» nomınatsııasyna – elordalyq «Jastar teatry», «Úzdik stsenografııalyq sheshim» nomınatsııasyna - S. Seıfýllın atyndaǵy Qaraǵandy oblystyq akademııalyq qazaq drama teatry («Qaragóz» tragedııasy, rejısseri G.Balpeısova) ıe boldy. Q.Qýanyshbaev atyndaǵy qazaq ulttyq mýzykalyq drama teatry («Voıtsek» dramasy, rejısseri. U.Qabyl) J.Aımaýytovtyń jıenshary Pavel Aımaýytov tikken arnaıy júldege, B.Rımova atyndaǵy Taldyqorǵan drama teatry («Qazaqtyń toıy bitpesin» dramasy, rejısseri D.Bazarqulov) «Amanat» partııasy Pavlodar oblystyq fılıaly usynǵan arnaıy júldege laıyqty dep tanyldy.
Buǵan qosa jekeleı akterlerdiń úzdik óneri de nazardan tys qalǵan joq. «Úzdik epızodtyq áıel adam beınesi» nomınatsııasyn «Rıchard ІІІ» qoıylymyndaǵy Gertsogına Iork roli úshin Aımaýytov teatrynyń akteri Taljibek Atambek, «Úzdik epızodtyq er adam beınesi» nomınatsııasyn «Tartıýf» komedııasyndaǵy roli úshin Sh.Qusaıynov atyndaǵy Aqmola oblystyq qazaq mýzykalyq-drama teatrynyń akteri Qaırat Myrzabolatov jeńip aldy. Al «Úzdik áıel adam beınesi» nomınatsııasy «Aqan seri týraly ańyz» tragedııasyndaǵy Bátımanyń rolin somdaǵan Á.Mámbetov atyndaǵy memlekettik drama jáne komedııa teatrynyń akteri Aqbota Makejanovaǵa, «Úzdik er adam beınesi» nomınatsııasy «Shınel» dramasyndaǵy roli úshin Sábıt Muqanov atyndaǵy Soltústik Qazaqstan oblystyq qazaq mýzykalyq-drama teatrynyń akteri Islam Jaqsylyqqa buıyrdy.