Elordalyq órt sóndirýshiler 10-qabattaǵy órtten 7 adamdy qutqardy

<p>Astanalyq órt sóndirýshiler kópqabatty úıdegi páterde bolǵan órtten 7 adamdy qutqardy, olardyń arasynda 3 bala bar, dep habarlaıdy Kazinform.</p>

«9 qańtar kúni saǵat 9:58-de Astana qalasy TJD órt sóndirý bólimsheleri Qabanbaı batyr dańǵyly, 59 mekenjaıyndaǵy páterdegi órt týraly habarlamaǵa attandy. Onda «Býdapesht» turǵyn úı kesheniniń 10 qabatyndaǵy páterdiń as úı bólmesinde jıhaz ben úı zattary janǵany anyqtaldy», - dep baıandady astanalyq TJD baspasóz qyzmeti.

Oqıǵaǵa Astana qalasy TJD jeke quramynyń 28 adamy men 7 dana tehnıkasy jumyldyryldy.

Olar kórshi páterden 7 adamdy, onyń ishinde 3 balany qutqardy.

Osylaısha, órt saǵat 10.32-de oqshaýlanyp, saǵat 10.35-te tolyq sóndirildi.

«Qutqarýshylar órt sóndirý tehnıkasy úshin joldyń jabylýy, jeke avtokólikterdiń kóptep turaqqa qoıylýy máselelerine tap boldy. Osyǵan baılanysty TJD avtokólikterdi kirme joldarda qaldyrmaýdy, turaq nemese turaq úshin oryn tańdaýdy, arnaıy tehnıkanyń ótýi úshin bos oryn qaldyrýdy eskertedi. Óıtkeni ár sekýnd pen mınýt bireýdiń ómiri men múlkin saqtaýǵa múmkindik beredi», - deıdi Tótenshe jaǵdaılar departamenti.