Elordalyq kásipkerler nasybaı satqany úshin aıyppuldy ulǵaıtpaýdy usyndy

<p>ASTANA. KAZINFORM &ndash; Astana qalalyq kásipkerler palatasy dırektorynyń orynbasary Abylaıhan Mújibaev nasybaı satqandarǵa aıyppuldy ázirshe ulǵaıtpaý qajettigin aıtty.</p>

«Menińshe, ázirge aıyppul mólsherin kóterýdiń qajeti joq. Tek qoldanystaǵy zańnama aıasynda jumys istep, shegilmeıtin temeki ónimderin staqany úshin kózdelgen aıyppuldy ǵana salý qajet», - dedi ol palatanyń Saýda jáne qyzmet keńesi otyrysynda.

Astana qalalyq ınvestıtsııa jáne kásipkerlikti damytý basqarmasy basshysynyń orynbasary Maqsat Janabaev elordada ótken aptadan bastap nasybaı jáne shegilmeıtin temeki ónimderin zańsyz satýdyń aldyn alýǵa baǵyttalǵan is-sharalardyń júrgizilip jatqanyn aıtady.

«Qaladaǵy 5 aýdanda 500-den astam dúken tekserildi. Nátıjesinde, zańsyz aınalymnan 10 tonna nasybaı alyndy. Bul jumys aldaǵy ýaqytta da jalǵasady. Baıqońyr aýdanynda nasybaı daıyndaýmen aınalysatyn jasyryn tseh jumysy áshkerelendi. Tárkilengen nasybaı joıyldy», - dedi ol.

Eske sala ketsek, Atyraýda ótken Ulttyq quryltaı otyrysynda QR Prezıdenti Qasym-Jomart Toqaev nasybaıdy óndirýge jáne taratýǵa 2015 jyly tyıym salynsa da, áli kúnge deıin kóshede, tipti azyq-túlik dúkenderinde ashyq satylyp jatqanyn synaǵan edi.

Qazir nasybaı satý boıynsha QR Ákimshilik quqyqbuzýshylyqtar týraly kodekste jaýapkershilik qarastyrylǵan (196-bap – «Taýarlarmen nemese ózge de zattarmen zańsyz saýda jasaý») jáne 25 AEK kóleminde aıyppul kózdelgen. Bul shamamen 92 300 teńgeni quraıdy.