Elordalyq dárigerler robot-assıstenttiń kómegimen 5 patsıentke ota jasady

<p>Astanada Akademık N.J. Batpenov atyndaǵy UǴTO dárigerleri robot-assıstenttiń kómegimen bes patsıentke erekshe operatsııa jasady. Olarǵa MÁMS aıasynda quny eki mln teńgege jýyq ota jasaldy, dep habarlaıdy <a href="Kazinform" target="_blank" rel="noopener">Kazinform</a> elorda ákimdiginiń resmı saıtyna silteme jasap.&nbsp;</p>

Jyl saıyn medıtsınalyq saqtandyrý qarajaty esebinen halyqqa travmatologııa, kardıohırýrgııa, neırohırýrgııa, ýrologııa, onkologııa jáne t.b. boıynsha júzdegen qymbat operatsııa jasalady. 

Búgingi tańda tize men jambas býyndaryn aýystyrý operatsııalary halyq arasynda úlken suranysqa ıe. 

Elordada akademık N.J. Batpenov atyndaǵy travmatologııa jáne ortopedııa ǵylymı ortalyǵynda 5 patsıentke robotpen tize aýystyrý boıynsha kúrdeli operatsııa jasaldy. Endoprotezdeýdiń ıdeıasy – adamnyń zaqymdalǵan býynyn jasandy ımplantpen almastyrý. Zaqymdalǵan aımaqtyń 3D skanerleýiniń arqasynda robot kómekshisi patsıentterdiń býynyna barlyq parametrdi matematıkalyq turǵydan minsiz esepteı otyryp ımplant qoıýǵa múmkindik berdi. Operatsııalar IT mamandarynyń qatysýymen kompıýterlik navıgatsııa arqyly jasaldy. 

«Jaqynda bizde robot-assıstenttiń kómegimen tize býynyn tolyq endoprotezdeý boıynsha operatsııalar jasaldy. Robot – bul bizdiń qaı jerde ekenimizdi kórip qana qoımaı ári bir mıllımetrge deıin, bir gradýsqa deıin quraldyń ornyn retteı alatyn aqyldy qural, al adam dál ol sııaqty tup-týra kóre almaıdy. Nátıjesi jaman emes. Naýqastar ózderin jaqsy sezinedi. Olar baldaqtyń kómegimen júre alady. Operatsııaǵa deıin olardyń qozǵalýy qıyn bolatyn. Otadan keıin olarǵa esh shekteý joq, býyndary búgilip, tolyq qozǵala alady. Tize býynyn endoprotezdeý shamamen 2 mln teńgeni quraıdy, oǵan ımplanttar, operatsııa, kúnine tósek-oryn, anestezııa, qajettilik boıynsha barlyq tekserýler men emdeý kiredi. Barlyq operatsııa MÁMS júıesinde patsıentterge tegin júrgizildi», - dedi N. Batpenov atyndaǵy UǴTO bólimshesiniń №7 travmatolog-ortoped dárigeri Jumahan Slámov. 

Qazirgi ýaqytta patsıentter ońaltýdyń 1 kezeńinen ótip jatyr. Bir jarym aıdan keıin olar ortalyqta qaıta ońaltýdan nemese turǵylyqty jeri boıynsha ońaltýdyń kelesi kezeńderinen ótýi múmkin. 

Ońaltý quny – 380 myń teńge, operatsııa quny – shamamen 2 mıllıon teńge. Patsıentterge arnalǵan operatsııalar da, ońaltý is-sharalary da MÁMS júıesinde júrgiziledi. 

Esterińizge sala keteıik, 2023 jyldyń basynan bastap Astana dárigerleri 35,2 mln teńge somasyna tize men jambas býyndaryn aýystyrý boıynsha operatsııalar jasady.