Elordaǵa otandyq «QazVac» vaktsınasynyń 6 myń dozasy jetkizildi
«Ótken aptada ǵana qazaqstandyq «QazVac vaktsınasynyń birinshi partııasy jetkizildi. Endi halyqtyń suraýy men qalaýy boıynsha qazaqstandyq ónimdi ekpe retinde qoldana alamyz. Dáriger retinde jáne eń aldymen, Qazaqstan Respýblıkasynyń azamaty retinde elimizdiń vaktsına shyǵarýǵa qabiletti elderdiń qatarynda bolǵany men úshin maqtanarlyq jaıt»,- dedi Nur-Sultan qalalyq Qoǵamdyq densaýlyq saqtaý basqarmasynyń basshysy Tımýr Muratov.
Onyń atap ótýinshe, elorda turǵyndary «Spýtnık-V» men «QazVac» vaktsınalarynyń birin tańdaı alady.
«Kúnine 6 myń adamǵa deıin ekpe salynady. Bastapqyda turǵyndar vaktsınaǵa saqtyqpen qarady. Biraq vaktsına almaý densaýlyqqa áldeqaıda qaýipti ekenin jáne tek osylaısha ózimizdi ınfektsııadan qorǵaı alamyz degen keń aýqymdy túsindirý jumystaryn júrgizý arqyly azamattar vaktsınalanǵandardyń qataryna óz erkimen qosyla bastady. Halyq arasynda qorqý men senimsizdik joıylyp, óz densaýlyǵy úshin jaýapkershilik arta tústi», - dedi ol.
Sonymen qatar vedomstvo basshysy saýda, oıyn-saýyq ortalyqtarynda vaktsınatsııa pýnkterin ashýdyń tıimdiligin de atap ótti. Búgin elordada vaktsınatsııa pýnkteri «Mega Silk Way», «Keruen», «Han Shatyr» jáne «Abý-Dabı Plaza» saýda ortalyqtarynda ashylǵan. Olarda kúnine 250-ge jýyq adam ekpe alady.
Nur-Sultan qalalyq Qoǵamdyq densaýlyq saqtaý basqarmasy baspasóz qyzmetiniń málimetinshe, halyqty vaktsınamen keń qamtý úshin qala ákimi Altaı Kólginovtiń tapsyrmasymen vaktsınatsııa pýnkteriniń sany 36-dan 100-ge deıin arttyryldy. Sondaı-aq medıtsınalyq-sanıtarııalyq kómek kórsetý uıymdary úshin jumys ýaqyty 8:00-den 24:00-ge deıin, saýda jáne oıyn-saýyq ortalyǵynda - saǵat 10:00-den 22:00-ge deıin ulǵaıtyldy.