Elordaǵa qansha dáriger jetispeıdi

NUR-SULTAN. QazAqparat – Elordadaǵy medıtsınalyq uıymdardy kadrlarmen qamtamasyz etý kórsetkishi 80,5 paıyzdy qurady. Bul týraly Nur-Sultan qalalyq qoǵamdyq densaýlyq saqtaý basqarmasynyń basshysy Sáýle Qısyqova aıtty, dep habarlaıdy QazAqparat tilshisi.

«Mindetti áleýmettik medıtsınalyq saqtandyrý júıesine daıyndyq jumystarynyń biri – qala emhanalaryn kadrlarmen qamtamasyz etý. 2019 jyldyń 9 aıynyń qorytyndysy boıynsha, astanadaǵy medıtsınalyq uıymdardyń kadrlarmen qamtylýy 80,5 paıyzdy qurady. Dárigerlik kadrlar jetispeýshiligi - 277 adam. Jalpy praktıka dárigerleri boıynsha 59 maman jetispeıdi. Árbir dáriger úshin negizi júkteme – 1700 adamnan kelýi tıis. Bul – Densaýlyq saqtaý mınıstrliginiń talaby, búgingi normatıv», - dedi Sáýle Qısyqova qoǵamdyq keńes otyrysynda.

Basqarma basshysynyń aıtýyna qaraǵanda, elordadaǵy negizgi emhanalarda dáriger mamandarmen qamtylǵan.

«Bul baǵytta jumys júrgizilip jatyr. Sonymen birge, 1 qazandaǵy jaǵdaı boıynsha qaladaǵy densaýlyq saqtaý uıymdarynda medıtsınalyq tehnıkamen qamtamasyz etý kórsetkishi 88 paıyzdy, al tehnıkanyń eskirýi – 47 paıyz. Dese de, jyl sońyna deıin bul kórsetkish ózgerýi tıis, sebebi, jaqynda qala emhanalar jańa medıtsınalyq qural-jabdyqtarmen qamtylady», - dedi ol.