Elordaǵa gaz kelse tarıf qymbattaı ma

NUR-SULTAN. QazAqparat - QR Energetıka mınıstri Qanat Bozymbaev elordaǵa gaz kelse, onyń baǵasynyń qansha bolatynyn aıtty, dep habarlaıdy QazAqparat tilshisi.

Onyń aıtýynsha, elorda turǵyndary kógildir otynǵa 2020 jyldyń basynda qol jetkizýi múmkin.

«Elordaǵa gaz qashan keledi dep kútip júrgender kóp. Bul jerde jergilikti ákimdiktiń jumysyna kóp nárse baılanysty. Barlyq toraptardy kestege saı iske qosyp úlgerse, 1 qańtardan bastap gaz tutyna bastaýymyz múmkin, - deıdi mınıstr Q.Bozymbaev.

Ol sondaı-aq, kógildir otyn baǵasy astanalyqtar úshin qandaı bolatyny áli de basy ashyq másele ekenin aıtty.

«Qosymsha jumystar týyndap, gazben qamtý shyǵyndary artpasa, gaz baǵasy da ózgermeýi kerek. Ázirge naqty qansha bolatynyn aıtý qıyn. Bul máseleni tıisti oryndarmen birge jyldyń ekinshi jartysynda talqylaımyz. Sol kezde naqty belgili bolady», - dedi Energetıka mınıstri.

Sondaı-aq, Bozymbaev janarmaı stansalarynda kógildir otynnyń nelikten qymbattap jatqanyn túsindirdi.

«Osydan birneshe jyl buryn kógildir otyn baǵasy 3 esege túsip, zaýyttar toqtap qala jazdaǵan. Shyndyǵyn aıtsaq, syǵymdalǵan gazdy janarmaı retinde satýdan óndirýshilerge paıda kóp emes. Tym bolmaǵanda shyǵynǵa batpaýy úshin baǵany sanaly túrde kóterip otyrmyz», - dedi ol.

Mınıstr óz sózinde, 27 jyl boıy gazdy óńdemeı, shıkizat kúıinde tutyný beleń alǵanyn, qazir bul jaǵdaı ózgerip, joǵary tehnologııalarǵa bet burý bastalǵanyn jetkizdi.

Eske salsaq, Energetıka mınıstri el aldyndaǵy eseptik kezdesýi barysynda Saryarqa gaz qubyryn salýǵa 2200 adam tartylǵanyn aıtqan bolatyn.