Elordaǵa esirtki jetkizý arnasy joıyldy

NUR-SULTAN. QazAqparat - Elordalyq polıtsııa qyzmetkerleri arnaıy operatsııa júrgizý barysynda jáne uzaq ýaqyt boıy júrgizilgen is-sharalardyń nátıjesinde elorda aýmaǵyna asa iri kólemde esirtki zattaryn jetkizip, satýmen aınalysqan qylmystyq top múshelerin ustady, – dep habarlaıdy QazAqparat.

Polıtsııa qyzmetkerleriniń úılestirilgen is-qımyldarynyń arqasynda elordaǵa kire beriste, Qaraǵandy – Nur-Sultan tas jolynda 36 jastaǵy júrgizýshiniń basqarýymen Toyota Estima markaly avtokólik ustaldy. Onyń salonynan salmaǵy 16 keliden asatyn «gashısh» tárkilendi.

«Kóliktiń ishinde qylmystyq toptyń 23 jastaǵy uıymdastyrýshysy men 20 jastaǵy sybaılasy bolǵan. Kúdiktiler bul zatty Shý qalasynan ákelip, elordada satpaq bolǵan. Esirtki quraldarynyń baǵasy «qara naryqta» 16 mıllıon teńge bolar edi.

Sondaı-aq arnaıy operatsııa barysynda polıtsııa qyzmetkerleri tas jolda 27 jastaǵy júrgizýshiniń basqarýymen Toyota Camry 50 markaly avtokólikti toqtatyp, odan da jeke tintý barysynda «gashısh» tárkiledi. Júrgizilgen operatsııanyń nátıjesinde zańsyz aınalymnan 16 keliden astam «gashısh» esirtki zaty shyǵaryldy», - dedi Nur-Sultan qalasy PD Esirtki qylmysyna qarsy is-qımyl basqarmasynyń bastyǵy Erlan Akbarov.

Atalǵan fakti boıynsha QK 297-baby 2-bóligimen «Esirtki quraldaryn, psıhotroptyq zattardy, sol tektesterdi ótkizý maqsatynda zańsyz daıyndaý, qaıta óńdeý, satyp alý, saqtaý, tasymaldaý, jóneltý nemese ótkizý» sotqa deıingi tergeý júrgizilýde. Ustalǵandar qamaýda, tergeý júrgizilýde.

Erlan Akbarovtyń aıtýynsha, elordaǵa esirtki quraldaryn ákelýge jasalǵan barlyq áreketterdiń joly qatań túrde kesiletin bolady.