Elordadanyń Kóktal shaǵyn aýdanynda saıabaq salynyp jatyr

  ASTANA. QazAqparat - Jyl sońyna deıin Astanada 5 shaǵyn gúl baǵy men bir saıabaqtyń qurylysy aıaqtalady. Bul týraly Astana qalasy ákimdigi tabıǵı resýrstardy jáne tabıǵat paıdalanýdy retteý basqarmasynyń ókili Nuraly Elibaev málim etti dep habarlaıdy QazAqparat.

Qala ákimdiginiń medıa ortalyǵyna bergen suhbatynda Nuraly Elibaev 2017 jyldyń sońyna deıin paıdalanýǵa beriletin shaǵyn gúl baqtarynyń qurylysyna 962,5 mln teńge qarastyrylǵanyn atap ótti.

Shaǵyn gúl baqtary Astananyń Birjan sal, Jeltoqsan, Sývorov, Táýelsizdik, Qoshqarbaev kósheleriniń boıynda jaıǵaspaq. Munymen qosa, jyl aıaǵyna deıin Seıfýllın kóshesindegi gúl baǵy qaıta jóndeýden ótedi.

«2017 jyly Jalaıyr kóshesindegi saıabaqtyń qurylys jumystary aıaqtalyp, ol paıdalanýǵa berildi. Jyldyń sońyna deıin 5 shaǵyn gúl baǵynyń qurylys-montajdyq jumystary aıaqtalady dep josparlanǵan. Jańa demalys oryndary qalalyq №1 emhananyń, qalalyq perınataldy ortalyqtyń, Birjan sal, Jeltoqsan, Sývorov kóshelerinde paıda bolady. Bul jumystardyń aıaqtalý merzimi bolyp, jyldyń sońy belgilendi», - dedi Astana qalasy ákimdigi tabıǵı resýrstardy jáne tabıǵat paıdalanýdy retteý basqarmasynyń bas mamany.

Ákimdiktiń tabıǵı resýrstardy jáne tabıǵat paıdalanýdy retteý basqarmasynda belgili bolǵandaı, bıyl sondaı-aq, «Kóktal» shaǵyn aýdanyndaǵy saıabaqtyń qurylysy bastalǵan. Josparǵa sáıkes, qurylys jumystary kelesi jyly aıaqtalmaq.

«Bıyl Kóktal aýdanynda saıabaqtyń qurylysy bastaldy. 2017 jyly iske asatyn jumystarǵa 683 mln teńge qarastyrylyp otyr. Jobanyń jalpy quny 3 mlrd 386 mln teńgeni quraıdy. Saıabaq 2018 jyly paıdalanýǵa beriledi dep josparlanyp otyr», - dep málimdedi Nuraly Elibaev.

Munymen qosa, bas mamannyń málimetinshe, 2018 jyly Astana qalasyndaǵy apatty jaǵdaıda turǵan úılerdiń ornynda jelekjoldar men gúl baqtary salynatyn bolady. Qazirgi tańda atalmysh nysandardyń qurylysyna bólinetin qarajat kólemi bıýdjet naqtylanǵannan keıin anyqtalmaq.

«Astana qalasy ákiminiń tapsyrmasy boıynsha 2018 jyly kóne apatty úılerdiń ornyna jelekjoldar men shaǵyn gúl baqtarynyń qurylysy josparlanady. Onyń ishinde 3 jelekjol, 8 gúl baǵy salynady delingen. Jelekjoldar Jeńis dańǵylynda (uzyndyǵy shamamen 100-150 metr), Abaı dańǵylynda jáne Keńesary kóshesiniń boıynda ornalasatyn bolady», - dep túıindedi sózin Astana qalasy ákimdigi tabıǵı resýrstardy jáne tabıǵat paıdalanýdy retteý basqarmasynyń bas mamany Nuraly Elibaev.