Elordadan Shymkentke bet alǵan avtobýs buzylyp, jolaýshylar qatty aıazda jolda qaldy

QARAǴANDY. QazAqparat – 28 qarashaǵa qaraǵan túni Qaraǵandy oblysynda TJD qyzmetkerleri úsh qutqarý operatsııasyn júrgizdi. Nátıjesinde 22 adam aıazdan qutqaryldy, dep habarlaıdy QazAqparat tilshisi.

Oblysta osy kúnderi qatty aıaz bolatynyn sınoptıkter ǵana emes, qutqarý qyzmeti de eskertken bolatyn.

Alaıda soǵan qaramastan ótken túnde kómek surap, qońyraý shalǵandar boldy.

Mundaı habarlamanyń biri 02:05-te kelip tústi.

Belgili bolǵandaı, Osakarov aýdanynyń Molodejnyı kentinen 3 shaqyrym jerde «Qyzylorda-Pavlodar» avtojolynda tehnıkalyq aqaýǵa baılanysty jeńil avtokólik toqtap qalǵan.

Qutqarýshylar kólikten eki adamdy evakýatsııalap, Molodejnyı kentine jetkizdi.

Ekinshi qutqarý operatsııasyn TJD qyzmetkerleri Shet aýdanynda saǵat 04:35-te júrgizdi.

«Almaty-Ekaterınbýrg» avtojolynyń 901 shaqyrymynda Aqsý-Aıýly aýylynan 18 shaqyrym jerde jolaýshy tasymaldaıtyn qalaarlyq avtobýs turyp qalǵan.

Synǵan avtobýstan TJD kúshimen Aqsý-Aıýly aýylyna 19 adam jetkizildi. Avtobýs «Astana-Shymkent» baǵyty boıynsha júrip bara jatqan.

Sonymen qatar, Shet aýdanynda 1984 jyly týǵan er adam habarsyz ketti. Túnge qaraı er adamnyń týystary qutqarýshylarǵa júgindi.

TJD men polıtsııa qyzmetkerlerinen quralǵan top izdeýge shyqty. Joǵalǵan adamdy olar basqa qystaqtan taýyp alyp, aýylǵa jetkizdi.

Qutqarylǵandar medıtsınalyq kómekti qajet etpedi.

Qaraǵandy oblysyndaǵy birqatar avtojolda qatty aıazǵa baılanysty qoǵamdyq jáne dızeldi avtokólikter úshin shekteý engizildi.

«Oblys aýmaǵynda daýyl týraly eskertý jarııalandy. Aýa raıy nasharlaǵanda alys qashyqtyqqa, ásirese túnde shyqpaǵan jón ekenin eskertemiz. Sapar aldynda avtokóliktiń tehnıkalyq jaramdylyǵyn tekserý, meteoboljam men daýyldy eskertý týraly aqparatty qadaǵalaý qajet», - dep eskertedi Qaraǵandy oblysy TJ departamenti.