Elordadan salt attylar ekspedıtsııasy úsh oblysty aralaýǵa attandy

ASTANA. QazAqparat - Astana qalasy ákimdiginiń qoldaýymen «Rýhanı jańǵyrý» baǵdarlamasynyń jáne Astana qalasynyń 20 jyldyǵyn toılaý aıasynda «Astana - uly dala elordasy» atty kópkúndik salt atpen júrip ótý ekspedıtsııasy bastaý aldy, dep habarlaıdy Astana qalasy ákimdiginiń resmı saıty.

Ekspedıtsııa Aqmola, Pavlodar, Qaraǵandy ​​ oblystaryndaǵy ulttyq parkter Buırataý, Baıanaýyl jáne Qarqaraly arqyly ótedi, týrdyń jalpy uzyndyǵy - 600 shaqyrymdy quraıdy. 10 adamnan quralǵan eriktiler toby búgin bas qalamyzdan baǵyt alyp Saryarqanyń sary tósin basyp ótip, 10 kúnnen soń at basyn Qarqaralyǵa tiremek. Top quramynda eki jasóspirim jáne eki majarlyq bar.

Saparǵa attanýshy azamattardy shyǵaryp salý saltanatynda sóz sóılegen Mádenıet jáne sport basqarmasy basshysynyń orynbasary Berik Marjyqpaev sherýshilerge aq jol, sát-sapar tilese, Ardagerler keńesi tóraǵasynyń birinshi orynbasary Ómirzaq Ozǵanbaıuly bata berdi.

Al Vengrııanyń Tótenshe jáne ókiletti elshisi Baranı Andrash sóz sóılep qazaq pen majarlyqtardyń týystas halyq ekenin, Majarlyqtar ózderin ejelgi qypshaqtardan taraǵanbyz dep esepteıtindigin aıta kele babalarynyń at tuıaǵynyń izi qalǵan Saryarqa tósimen júrip ótý bizge maqtanysh, baqyt dedi.

«Biz 10 kúnniń ishinde Buırataý, Baıanaýyl jáne Qarqaraly ulttyq parkterine toqtaımyz degen oıdamyz. Jalpy, sapardyń uzyndyǵy shamamen 600 shaqyrymdy quraıdy. Men mundaı jobaǵa ekinshi jyl qatysyp otyrmyn. Osy jobaǵa muryndyq bolyp otyrǵan Berik Aqylbek aǵamyz. Bıyl bizdiń qatarymyzda eki vengrlik azamat bar. Ata-baba jolymen júrip ótý, eldegi ishki týrızmge úles qosý. Bolashaqta osyndaı salt atpen júrip ótetin týrıstik baǵyttar bolady degen oıdamyn», - deıdi saparǵa qatysýshy Aıdos Nuraqyshev.

Top jetekshisi Berik Aqylbek bundaı sharany 3 jyl qatarynan ótkizýde, alǵashqy salt atty sherýdi 2016 jyly Qazaq eliniń Táýelsizdiginiń 25 jyldyǵy qurmetine jáne byltyr halyqaralyq EKSPO kórmesine arnaǵan.

Ekspedıtsııaǵa qatysýshylar kúnine júz shaqyrym júrýdi josparlaýda, ózderimen birge as-sý, dalaǵa qonýǵa arnalǵan palatkalar alǵan. Barlyq kerek-jaraǵymyz ózimizben birge deıdi jigitter. Mundaı is-sharaǵa siz de qatysa alasyz, dál osy jolǵy ekspedıtsııa quramynda Pavlodar, Aqmola, Qaraǵandy oblystarynan kelgen azamattar bar.

Bul is-shara qazaqstandyq patrıotızmdi tárbıeleýge jáne qazaqstandyqtardyń qoǵamdyq sanasynda elimizdiń Táýelsizdiginiń damý jolyndaǵy elordanyń tarıhı rólin nyǵaıtýǵa baǵyttalǵan.