Elordadan Arysqa «Qamqorlyq» kerýeni jóneltildi

NUR-SULTAN. QazAqparat - «Arys, bir birgemiz» aktsııasy aıasynda arystyqtarǵa gýmanıtarlyq kómek berý maqsatynda Nur-Sultan qalasynan Túrkistan oblysyna «Qamqorlyq» kómek kerýeni jolǵa shyqty, dep habarlaıdy QazAqparat tilshisi.

Kómek kerýeni Báıterek monýmentiniń janynan jolǵa shyqty. Arystyqtardy qoldaý maqsatyndaǵy aıtýly sharaǵa reseılik «MÝZ-TV» arnasynyń dırektory Arman Dáýletııarov, otandyq estrada juldyzdary Maıra Іlııasova, Sáken Maıǵazıev, Baýyrjan Isaev, Ernar Sadyrbaı, aǵaıyndy Júginisovter, akter Ádil Ahmetov keldi.

Mádenıet jáne sport mınıstrliginiń baspasóz hatshysy Aıdar Qyryqbaıulynyń aıtýyna qaraǵanda, kómek kerýenin birneshe mekeme jasaqtaǵan. Atap aıtqanda, Q.Muńaıtpasov atyndaǵy mektep-ınternaty, «Qazrestavratsııa» mekemesi men «Qazaqkontsert» memlekettik kontserttik uıymy, Sh.Shaıahmetov atyndaǵy «Til-Qazyna» ulttyq ortalyǵy, «Astana Opera» teatr jáne balet teatry, Ulttyq akademııalyq kitaphana, L.Gýmılev atyndaǵy EUÝ men «Qazaq Týrızm» kompanııasynyń qyzmetkerleri kerýen jasaqtap, Arysqa azyq-túlikter men taýarlardy jóneltti.

«Arysta bolǵan jaǵdaıǵa baılanysty Mádenıet jáne sport mınıstr Aqtoty Raıymqulovanyń bastamasymen bizdiń vedomstvoǵa qarasty óner oshaqtarynyń basshylary, óner adamdary jumylyp, Arys halqyn rýhanı qoldaý maqsatynda Shymkentke ketkenin bilesizder. Mundaǵy maqsat - án aıtý nemese bı bıleý, turǵyndar rýhanı turǵyda qoldaý ekenin atap ótý kerek. Ánshiler óz qaltalarynan 16 mln teńge jınap, Arysqa kómektesýge arnalǵan shotqa aýdardy. Mádenıet jáne sport mınıstrligi qyzmetkerleri bir kúndik jalaqysyn berdi. Odan bólek, eki qalada kómek shtabyn qurdy. Sol shtabtyń jumyldyrýymen 2 qaladaǵy 3 shtabtan 15 tonna kúrish, 10 tonna un, makaron ónimderi, dári-dármek, matras, jastyq, kórpe, kıim-keshek jınaldy. Bári de jınalǵan somaǵa satyp alyndy», - dedi Aıdar Qyryqbaıuly.

Arystyqtarǵa qoldaý bildirý sharasynda Máskeýden arnaıy ushyp kelgen MÝZ-TV» arnasynyń dırektory Arman Dáýletııarov ta sóz sóıledi. Onyń aıtýynsha, Arystaǵy qaıǵy - bárine ortaq.

«Ushaqtan jańa ushyp keldim. Arystaǵy oqıǵa bizdiń ortaq qaıǵymyz. Qazaq bolǵandyqtan emes, qarapaıym adam retinde arystyqtardyń qaıǵysyn bóliskimiz keledi. Óz tarapymyzdan kómek berdik. Eshbir jerde mundaı qaıǵy bolmasyn», - dedi Arman Dáýletııarov.

Óz kezeginde «Qazaqkontsert» memlekettik kontserttik uıymynyń dırektory Jeńis Seıdýllauly jumyla kótergen júk jeńil ekenin atap ótti.

«Osyndaı kezde QR Mádenıet jáne sport mınıstrligine qarasty óner oshaqtarynyń atynan qolymyzdan kelgenshe kómek berip jatyrmyz. Sol jaqtaǵy adamdar jalǵyzbyz dep oılamasyn. Bólisseń ǵana qaıǵy azaıady», - dedi Jeńis Seıdýllauly.