Elordadan 100 mln teńge men 1 altyn quımasyn zańsyz áketpek bolǵan azamat ustaldy
14:29, 11 Mamyr 2023
ASTANA. QazAqparat – «Áýejaı Astana» keden beketi arqyly 100 mln teńge men altyn quımasyn alyp ótpek bolǵan azamat anyqtaldy. Bul týraly QazAqparat tilshisi Qarjy mınıstrligine qarasty Memlekettik kirister komıtetiniń baspasóz qyzmetine silteme jasap habarlaıdy.
«Bıyl sáýir jáne mamyr aılarynda Astana qalasy boıynsha Memlekettik kirister departamentiniń «Áýejaı Astana» keden beketinde 100 mln teńgeden astam aqsha men 1 quıma altyndy zańsyz áketý faktileri anyqtalyp, joly kesildi.
Kúdikti «Astana-Antalıa» baǵytyndaǵy áýe reısiniń kedendik baqylaýynan ótý kezinde ustaldy. Onyń júgin tekserý kezinde 118 392 dollar, 28 750 rýbl, 92 885 eýro somasyna deklaratsııalanbaǵan qolma-qol aqsha tabyldy», - dep málim etti vedomstvonyń baspasóz qyzmeti.
Memlekettik kirister departamenti el aýmaǵynan 10 000 dollardan asatyn qolma-qol shetel valıýtasyn alyp shyǵýǵa tyıym salynǵanyn atap ótti. Mundaı quqyqbuzýshylyqtar úshin kináli QR zańnamasyna sáıkes, ákimshilik nemese qylmystyq jaýapqa tartylady.