Elordadaǵy JEO-3 qashan iske qosylady

NUR-SULTAN. QazAqparat – Elordada úshinshi jylý elektr ortalyǵynyń qurylysyn merdiger bekitilgen merzimnen keshiktirip jatyr, dep habarlaıdy QazAqparat tilshisi.

Búgin Úkimet otyrysynda Energetıka mınıstri Bolat Aqsholaqov elordada jylý energııasynyń tapshylyǵyn jabý úshin JEO-3-ti paıdalanýǵa engizýdi jedeldetý qajet ekenin aıtty.

Óz kezeginde Nur-Sultan qalasynyń ákimi Altaı Kólginov keler jyldary elordada jylý energııasynyń tapshylyǵy bolýy múmkin ekenin jetkizdi.

«Qazirgi kezde JEO-3 qurylysy qaıta jandandy. Bul turǵyda Úkimetten tıisti qoldaý bar. Biraq merdiger bekitilgen merzimnen keshiktirip jatyr. Osy oraıda ákimdik tıisti sharalardy qabyldaýda. Bul nysan keler jyly iske qosylady», - dedi A. Kólginov.

Budan buryn habarlanǵandaı, bıyl tamyz aıynda elorda ákimi Altaı Kólginov qaladaǵy JEO-3 qurylysy boıynsha merdigerge qatań talaptar qoıylǵanyn aıtty.