Elordadaǵy túbirtekterde din máseleleri boıynsha senim telefony paıda bolady

NUR-SULTAN. QazAqparat - Nur-Sultan qalasynyń Din isteri basqarmasy biryńǵaı tólem qujatynyń arnaıy túbirtekterinde Ikomek-109 din máseleleri jónindegi senim telefony týraly aqparatty ornalastyrdy, dep habarlaıdy elorda ákimdiginiń resmı saıty.

Túbirtekter Qazaqstanda dinı ekstremızm men terrorızmge qarsy is-qımyl jónindegi 2018-2022 jyldarǵa arnalǵan memlekettik baǵdarlamany iske asyrý sheńberinde ázirlendi.

Basylǵan jáne taratylǵan túbirtekterdiń taralymy 300 myńnan astam danany qurady. Olarǵa ornalastyrylǵan aqparat túrli destrýktıvti dinı ıdeologııalardyń teris áserinen azamattardy qorǵaý jáne aldyn alýǵa, dintaný jáne quqyqtyq saýattylyqty arttyrýǵa, dinı ekstremızm men terrorızmniń aldyn alýǵa yqpal etedi.

Sonymen qatar, din isteri basqarmasy keńes beredi:

- qoǵamdyq oryndarda dinı ádebıetterdi satyp almaýǵa;

- kúmándi ýaǵyzshylardyń ýaǵyzdaryna qatyspaýǵa;

- tekserilmegen derekkózderden (saıttar, áleýmettik jelilerdegi toptar/qaýymdastyqtar) din týraly bilim almaýǵa.

Qajet bolǵan jaǵdaıda teolog, dintanýshy, psıhologtan din salasyndaǵy máseleler men usynystar, dinı nysandar, merekeler boıynsha keńes alý nemese din salasyndaǵy memlekettik qyzmetterdi alý úshin Ikomek – 109 tegin nómiri boıynsha habarlasýǵa bolady.