Elordadaǵy psıhıkalyq densaýlyq ortalyǵynan COVID-19-dan sońǵy naýqas emdelip shyqty

NUR-SULTAN. QazAqparat - Búgin qalalyq psıhıkalyq densaýlyq ortalyǵynyń (QPDO) bazasynda ornalasqan ınfektsııalyq statsıonardan koronavırýs ınfektsııasy dıagnozy qoıylǵan sońǵy naýqas emdelip shyqty, dep habarlaıdy elorda ákimdiginiń resmı saıty.

15 maýsymnan bastap bul ortalyq COVID-19 bar naýqastarǵa arnalǵan juqpaly aýrýlar statsıonary bolyp ózgertildi. Bir jarym aı ishinde munda 1044 naýqas emdeldi.

«Búgin sońǵy patsıent emdelip shyqty. Bárimiz táýlik boıy jumys istedik. Atap aıtqanda, provızor Melıssa Sameeva bárin dári-dármektermen qamtamasyz etti, meniń orynbasarym Larısa Gom, bas medbıke Gúlnar Altynbekova aldyńǵy qatarda jumys istedi. Tósek-oryndardy qaıta beıimdeý, reanımatsııany ornalastyrý alǵashynda qıyndyq týdyrsa da, biz onyń bárin eńserdik. Bizde Aınagúl Jambýrchınova, Saltanat Mýsına sekildi bilikti dárigerler jumys istedi. Óz komandama joǵary biliktilik tanytqany úshin alǵys bildirgim keledi. Biz qoldan kelgenniń bárin jasadyq» – deıdi qalalyq psıhıkalyq densaýlyq ortalyǵy dırektorynyń mindetin atqarýshy Olga Komarova.

58 jastaǵy Ýálıhan emhanadaǵy COVID-19-dy jeńgen eń sońǵy naýqas.

«Ortalyq qyzmetkerlerine alǵys bildirgim keledi. Munda 14 shildede túsip, búgin emdelip shyqqaly jatyrmyn. Emniń barlyq kezeńinde ortalyq qyzmetkerleri úlken qamqorlyq kórsetti. Dári-dármekter men qajettiniń bárimen qamtamasyz etti. Dáriler tıimdilik kórsetip, alǵashqy kúnderden-aq nátıje berdi. Jaǵdaıym tek jaqsara tústi. Tamaǵy da óte jaqsy. Barlyǵyna, medbıkelerge, dárigerlerge, ujymnyń barlyǵyna kóp rahmet», – deıdi ol.

27 shildedegi jaǵdaı boıynsha, Nur-Sultanda koronavırýs juqtyrǵan 10 070 naýqas tirkeldi. Olardyń 6 766-sy emdelip shyqty.

Olga Komarovanyń aıtýynsha, dezınfektsııadan keıin psıhıkalyq densaýlyq ortalyǵy jaqynda óziniń burynǵy profıline sáıkes jumysyn qaıta bastaıdy.