Elordadaǵy memlekettik balabaqshalarda ata-ana tólemaqysy ósedi

ASTANA. QazAqparat – Elordanyń bilim basqarmasy «2023 jylǵa arnalǵan Astana qalasynyń mektepke deıingi uıymdarynda mektepke deıingi tárbıe men oqytýǵa memlekettik bilim berý tapsyrysyn, ata-ana tólemaqysynyń mólsherin bekitý týraly» qaýlysynyń jobasyn ázirledi, dep habarlaıdy QazAqparat tilshisi.

«Taýarlar men qyzmetterge baǵanyń ósýi nátıjesinde memlekettik balabaqshalardaǵy ata-analardyń tamaqtaný aqysynyń quny tamaqtanýdy uıymdastyrý shyǵyndaryn ótemeıdi», - delingen Ashyq NQA portalynda jarııalanǵan qujatta.

Ákimdik qaýlysyna saı, mektepke deıingi memlekettik bilim berý uıymdarynda ata-ana tólemaqysy myna mólsherge qymbattaıdy:

- jalpy bilim beretin mektepke deıingi uıymdar úshin - 41 718 teńgeden 46 189 teńge deıin;

- balalardyń tolyq kúndik shaǵyn ortalyǵy - 31 995 teńgeden 46 189 teńgege deıin;

- arnaıy mektepke deıingi uıymdar, jalpy bilim beretin mektepke deıingi uıymdardaǵy arnaıy jáne ınklıýzıvti toptar úshin - 91 118 teńgeden 102 665 teńgege deıin;

- mektepke deıingi sanatorlyq uıymdar úshin - 62 040 teńgeden 89 204 teńgege deıin;

- balalardyń tolyq emes kúndik toptary úshin - 18 066 teńgeden 20 202 teńgege deıin;

- memlekettik mektepke deıingi uıymdarda tamaqtanǵany úshin aqy tóleý - 16 800 teńgeden 20 800 teńgege deıin.

Qujat 3 maýsymǵa deıin kópshilik talqylaýda bolady. Keıin osy aıdan bastap qoldanysqa engiziledi.