Elordadaǵy Quryltaıǵa 7 elden qandastarymyz arnaıy poıyzben keldi

ASTANA. QazAqparat -  Búgin «Nurly jol» jańa vokzalynda Astanadaǵy besinshi Dúnıejúzi qazaqtarynyń quryltaıyna qatysýshylardy saltanatty kútip alý rásimi ótkizildi.

«QTJ» UK» AQ elordada maýsymnyń 22-25 kúnderi ótkiziletin besinshi Dúnıejúzi qazaqtarynyń quryltaıyna bes jańa úlgidegi jolaýshylar vagonyn bóldi.

  Almaty-Astana- Nurly jol baǵdarymen kelip toqtaǵan arnaıy poıyzben Tájikstan, Túrikmenstan, Aýǵanstan, Iran, Monǵolııa, Qytaı, Germanııadan etnıkalyq qazaqtar kelip jetti, dep habarlaıdy «Qazaqstan temir joly» UK» AQ baspasóz qyzmeti.

 «Ár kelgen saıyn Astananyń jasaryp, jańǵyrǵanyna tań qalýmen kelemin. Búgin bizdi jańa zamanaýı ǵajaıyp vokzalda qushaq jaıa kútip aldy. Munda jolaýshylar úshin barlyq jaǵdaılar jasalǵan eken»,-deıdi mońǵolııalyq Lashyn Áýketaıqyzy.

  Quryltaı qonaqtary Astanada Halyqaralyq mamandandyrylǵan EKSPO-2017 kórmesinde, «Qazanat» etnoaýylynda, Ulttyq murajaıda bolyp, birqatar mádenı oryndardy aralamaq.

 Besinshi Dúnıejúzi qazaqtarynyń quryltaıyna 750 qonaq men delegattar, onyń ishinde 39 alys ta jaqyn shet elderden  350 adam keledi.