Elordadaǵy «Qazaq eline myń alǵys!» monýmentine gúl shoqtary qoıyldy
Saltanatty sharaǵa Parlament Májilisiniń depýtattary men Qazaqstan halqy assambleıasynyń músheleri jáne qala turǵyndary qatysty.
«Eń aldymen Alǵys aıtý kúninde barlyq azamattarǵa el damýyna úlken úles qosqany úshin úlken alǵys bildiremin! Alǵys aıtý – bul bizdiń halqymyzda bólek bir mádenıet. Biz árqashan bir-birimizge alǵys aıtyp júremiz. Máselen, qazir de qasymyzda kóshelerdi qardan tazartyp júrgen adamdarǵa alǵys aıtqym keledi. Búgingi sharaǵa kelgen jýrnalısterge, ulttyq mádenı ortalyqtardyń qyzmetkerlerine, tatýlyq baǵytynda jumys istep júrgen barlyǵyna myń alǵys!», - dedi QR Aqparat jáne qoǵamdyq damý mınıstri Asqar Ýmarov.
Sonymen birge, Assambleıa atynan saılanǵan Májilis depýtaty Saýytbek Abdrahmanov Alǵys aıtý kúni osymen jetinshi jyl qatarynan atalyp ótkenin aıtty.
«Bul erekshe mándi mereke, kóktemniń alǵashqy kúninde bizdiń Assambleıanyń qurylǵan kúnimen tuspa-tus taǵaıyndalǵan edi. Osy memlekettiń etnostarynyń birligin kózdiń qarashyǵyndaı saqtaýdy bizge úıretken tulǵanyń taǵaıyndaǵan merekesi. Sondyqtan biz búgingi tańda Qazaqstan etnostaryna ózine jasalǵan jaqsylyqty eselep qaıtarǵan halyqtardyń bárine biz de alǵys aıtamyz!», - dedi S. Abdrahmanov.
Aıta keteıik, 2016 jyldyń 14 qańtardan bastap 1 naýryz – elimizde Alǵys aıtý kúni dep jarııalanǵan. Bul kún qıyn-qystaý kezeńderde qýanysh pen qaıǵyny qatar bólisip, pana bola bilgen qazaq halqyna ózge ult ókilderiniń alǵys aıtatyn sáti. Dál osy kúni 1995 jyly elimizde Qazaqstan halqy Assambleıasy qurylǵan edi.