Elordadaǵy kabel kárizderi qyzmeti monopolıster qaraýynan alynbaq

NUR-SULTAN. QazAqparat – Nur-Sultanda kabel kárizderine kútim men qyzmet kórsetý mindeti monopolıst kompanııalardyń qaraýynan alynady. Bul týraly qala ákimdigine qarasty CTS seriktestiginiń basqarýshy dırektory Aıdar Adaev málim etti, dep habarlaıdy QazAqparat tilshisi.

«Turǵyn úı nemese basqa da ǵımarat turǵyzǵanda kabel kárizderi birge salynady. Sol arqyly turǵyndar baılanyspen qamtylady. Sáıkesinshe, kabel kárizderine turaqty kútim kerek. Sebebi, keıde káriz qudyqtary isten shyǵyp jatady. Onyń ústine, elorda batpaqty óńir bolǵandyqtan, káriz kútimi erekshe baqylaýdy talap etedi. Al ol úshin qarajat kerek. Aınalyp kelip, salmaq qala ákimdiginiń bıýdjetine túsedi. Qazirgi ýaqytta bul qyzmetti monopolııa kompanııalary atqarady. Atap aıtqanda, «Qazaqtelekom», «Transtelekom», «Elıtkom», taǵy sol sııaqty. Endigi ýaqytta qaladaǵy kabel kárizderine kútim jaýapkershiligin bizge júkteýdi surap otyrmyz, ıaǵnı kabel kárizderin kútip ustaý, tazalaý, jóndeý sekildi mindetterdi moınymyzǵa almaqpyz», - dedi Aıdar Adaev atalǵan máseleni talqylaýǵa arnalǵan jıynda.

Onyń aıtýynsha, búginde CTS qala boıynsha 29 nysannyń kabel kárizi qyzmetine jaýapty. Naqtylap aıtqanda, Esil aýdany boıynsha 17, Almaty aýdanynda 10 jáne Saryarqa aýdanynda 2 nysan bar.

«Atalǵan nysandar boıynsha kabel kárizin júrgizetin bolsa, monopolııa kompanııalary aldymen bizge júginedi. Taǵy bir eskeretin jaıt, bizdiń jaýapkershiligimizge ótkeni úshin bıýdjetten qosymsha qarjy talap etilmeıdi. Biz kabel kárizine qatysty barlyq esep-qısapty qalalyq telekommýnıkatsııa komıtetimen kelisip júrgizemiz», - deıdi ol.

Sondaı-aq, spıker kabel kárizderine tek baılanys (ınternet) qyzmeti ǵana kiretinin eske saldy.

Buǵan deıin «Qazaqtelekomnyń» 28,8 paıyz aktsııasy memleketke qaıtarylatyny habarlanǵan bolatyn.