Elordadaǵy Qabanbaı batyr dańǵylyn keńeıtý maýsym aıynda bastalady

NUR-SULTAN. QazAqparat - Nur-Sultandaǵy Qabanbaı batyr dańǵylyn jańartý jumystary bıylǵy maýsym aıynda bastalady, dep habarlaıdy QazAqparat.

QR Indýstrııa jáne ınfraqurylymdyq damý mınıstrliginiń málimetinshe, Esil ózeni kópirinen Nursultan Nazarbaev halyqaralyq áýejaıyna deıingi aralyqtaǵy Qabanbaı batyr dańǵylyn jańartý jumystary 1 maýsymda bastalady.

QR Indýstrııa jáne ınfraqurylymdyq damý mınıstri Beıbit Atamqulov elorda úshin mańyzdy nysannyń qurylys naýqanyna daıyndyǵyn tekserdi.

Joba aıasynda jalpy uzyndyǵy 17,353 shaqyrymdy quraıtyn Qabanbaı batyr dańǵylyn 6-8 jolaqqa deıin keńeıtý kózdelgen. Budan bólek, jańartý jumystarynan ótken soń elordada Qabanbaı batyr jáne Turan dańǵyldarynyń arasynda kóliktik torap paıda bolady.

Joba kólik aǵynyn arttyryp, atalǵan jolda jıi bolyp turatyn kólik keptelisin azaıtýǵa septigin tıgizedi.